Upat ka mga kawatan naabtan sa tag-iya sa usa ka kan-anan nga nahimutang sa dan F. Vestil, Barangay Mambaling, Cebu City sa dihang gipanghabwa ang mga gamit sa establisemento sa alas 7:40 sa gabii sa Lunes, Abril 22, 2024.
Usa sa upat kanila nakuptan sa negosyante sa dihang iyang naabtan atol sa ginukdanay kay gilukdo pa niini ang lamesa nga kinawat.
Ang suspek giila nga si Jasper Celis, 18, ulitawo, taga-Sityo Manga, Brgy. Mambaling, Cebu City, samtang ang tulo niya ka mga kauban nakaipsot.
WA MANGABLI
Base sa imbestigasyon sa Mambaling Police Station, ang tag-iya sa establisemento nga si Rodulfo Delos Santos, 68, minyo, taga-dan Abellana, Brgy. Suba, Cebu City, nga wa sila mangabli sa ilang kan-anan sa Sabado ug Dominggo, Abril 20-21 kay nilarga siya uban sa iyang pamilya sa Manila.
Saysay ni P/Maj. John Lynbert Yangco, hepe sa Mambaling Police Station, nga si Delos Santos niduaw sa iyang establisemento nianang Lunes sa gabii aron makapanglimpyo kay mangabli sa Martes, Abril 23.
Apan nakurat na lang si Delos Santos nga adunay upat ka mga tawo nga nanghabwa sa mga butang sud sa iyang restaurant.
“Nasurprisa sila, unsa gud ni gipanghakot man. Misinggit ang tag-iya nga ‘mga kawatan’,” matod pa ni Yangco base sa sulti sa tag-iya.
Nagkatibuwaag og panagan ang mga kawatan human nakadungog sa tingog sa tag-iya.
Nakuptan ni Delos Santos si Celis nga suway nga nieskapo samtang galukdo sa lamesa.
Nadala sa mga kawatan ang usa ka mahalon nga tablet, siyam ka dining tables, usa ka set sa billiard balls, biseklita nga gibana-bana nga mokabat ang tanan dul-an sa P40,000.
NAGBALIK-BALIK
Nakahigayon og balikbalik ang mga kawatan nga nanghakot sa ilang mga kinawat nga butang kay ilang nasuta nga way tawo human sa duha ka adlaw nga sirado.
Si Celis nibutyag nga nakasuyop silang daan og ilegal nga drugas ug ilang natripingan ang maong restaurant nga way tawo.
Sumala pa nga siya maoy unang nisulod sa establisemento tungod kay sayon ra siyang nakalusot tungod sa iyang yagpis nga lawas human siya nikatkat.
Ang iyang mga kauban diha sa gawas nagpaabot ug si Celis maoy tigtunol sa mga butang aron ipagawas.
Sa dihang naabtan sa tag-iya, sila nikaratil sa pagpanagan dala ang ubang kinawat.
“Pagdagan nako nasugatan ko sa tag-iya. Nadakpan na hinuon ko kay bug-at man ang lamesa,” sigun pa ni Celis.
Sa dihang giimbestigar, siya nitug-an nga wa siya makaila niini, gani nangayo siya og pasaylo sa tag-iya.
Atol niining pagsuwat, gisubay sa kapulisan kon asa gidala ang mga kinawat nga butang ingon man ang pag-ila sa ubang suspek.
Nasayran nga ang suspek kaupat na nadakpan sa Mambaling Police sa pagpangawat. / GPL