'Kawata’ng gigutom', 3 ka mahalong igtatari gikawat

'Kawata’ng gigutom', 3 ka mahalong igtatari gikawat
NAG-FOODTRIP: Wa ang-anga ni Lorenzo Batoctoy, 29, tulo ka mahalong pang-derby nga igtatari iyang gihuong, aron unta ang usa niini iyang litsunon kay siya gigutom. / GPL

Naghinamhinam nga makakaon og litsong manok, tulo ka mahalong mga manok igtatari nga gipanag-iya sa prominente’ng pamilya sa dakbayan sa Sugbo gikawat sa 29 anyos nga lalaki’ng way trabaho.

Si Lorenzo Batoctoy, 29, ulitawo, taga-Barangay Pardo, Cebu City, nasikop Lunes sa buntag, Hunyo 10, human nagukdan sa caretaker sa manok igtatari sa Alta Vista, Barangay Poblacion Pardo, Cebu City.

Ang mga mahalong manok igtatari gipanag-iya ni Victor Aznar Siera, giatiman sa caretaker nga si Edgar Tajada, 27, kinsa nakabantay sa pagpangawat ni Batoctoy.

GIHUONG SA KURAL

Asoy ni Tajada nga sa dihang iyang gipangsusi ang iyang gigalam nga mga igtatari, iyang nakita si Batoctoy nga nigawas sa barbwire fence nga nagbitbit og sako.

Sa pagkamatikod ni Batoctoy, nikaratil kini sa pagdagan dala ang sako nga gisudlan sa tulo ka mga manok igtatari.

May na lang kay nagukdan niya ang suspek ug nabawi ang duha ka puwa manok ug usa ka ogis nga pang-derby nga mga manok.

Ang mga manok igtatari mokantidad og tag-P5,000 ang usa.

Si Batoctoy nga nahinabi sa Superbalita Cebu niangkon sa krimen ug nangayo’g pasaylo.

Iyang pangangkon nga iyang giuli ang mga manok kay siya nakonsensiya.

NAG-FOODTRIP

Pasabot pa niya nga hubog siya niadtong higayona human nagyarok og Kulafu ug gigutom hinungdan nga iyang gi-tripingan ang mga igtatari.

“Food trip nako naghunahuna nga lami kaayong ikaon og paa sa manok. Paborito kaayo nako isugba ang paa sa manok,” dugang ni Batoctoy.

Plano unta niya nga ang ogis maoy iyang luto-on samtang ang duha ka puwa nga mga manok iyang ibaligya sa tag-P500.

Nasayran nga nabilanggo siya sa makadaghang higayon tungod sa pagpangawat og manok. / GPL

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph