Nahimo nang opisyal ang pagbalhin ni superstar Kevin Durant gikan sa Phoenix Suns ngadto sa Houston Rockets.
Tipik kini sa record-setting nga pagbinayloay og mga magduduwa sa National Basketball Association (NBA) diin adunay pito ka teams ang nangahilambigit.
Ang kining talagsaong kasabutan naaprubahan sa NBA sa Lunes, Hulyo 7, 2025 (PH time).
Gawas sa Suns ug Rockets, ang ubang teams nga nangahilambigit ning maong makapakugang nga kasabutan mao ang Atlanta Hawks, Minnesota Timberwolves, Golden State Warriors, Brooklyn Nets, ug Los Angeles Lakers.
Moabot sa 13 ka mga magduduwa ang nangahilambigit ning maong kasabutan.
Sa ilang pagbuhi ni Durant, nadawat sa Suns gikan sa Rockets sila si Fil-Am star Jalen Green ug Dillon Brooks.
Gawas ni Durant, nadawat sab sa Rockets si Clint Capela gikan sa Hawks. Daghan pa nga mga kasikas ang nahitabo ning maong kasabutan.
Ang Suns nagpasalamat ni Durant sa natampo niini sa ilang organisasyon.
“One of the greatest to ever play the game, we are grateful for the impact Kevin made on our organization and in our community,” asoy ni Phoenix general manager Brian Gregory nga napatik sa AP News.
“As a member of the Suns, he climbed the scoring charts to become just the eighth player in NBA history to score 30,000 career points, and we wish him the best as he continues his career in Houston.”
Ang Rockets maoy ikalimang team nga maduwaan ni Durant sunod sa Oklahoma City Thunder, Warriors, Nets, ug Suns.
Si Durant kinsa nasulod sa NBA isip No. 2 overall pick sa Seattle Supersonics (kanhi Thunder) niadtong 2007, nakadaog og duha ka titulo ubos sa kampo sa Warriors niadtong 2017 ug 2018.
Nahimong Rookie of the Year si Durant niadtong 2008, regular season MVP niadtong 2014, Finals MVP niadtong 2017 ug 2018, ug four-time scoring champion. / Gikan sa wires