Kilay sa utility worker nagisi sa sukmagay

SunStar Local News
SunStar Local News

Nabalda ang pagtuman sa sugo sa lawas sa usa ka utility worker sa Badian District Hospital kay “gihasi” sa off duty nga security guard sa alas 12:10 sa kaadlawon sa Martes, Mayo 28, 2024 sa Brgy. Pablacion, lungsod sa Badian, Sugbo.

Si Hilario Quilistino, 44, dunay kapuyo, taga Brgy. Poblacion, Badian nagisian sa iyang tuong kilay. Wala na igkita ang suspek nga si Joel Sitones, minyo, taga Brgy. Talayong, Badian, security guard sa Badian District Hospital.

Si Police Staff Sgt. Jomar Nocete sa Badian Police Station nga nahinabi sa Superbalita Cebu, niingon nga ang biktima nitubag sa sugo sa lawas.

Nakurat kini dihang kalit nga nilagubo ang pansayan kay ang guwardiya nga off duty nagpunay og panuktok nga langas kaayo.

Ang biktima wala makatarong sa pagpagawas sa iyang hugaw niadtong tungora gumikan sa pagsamok sa guwardiya. Sa paggawas sa biktima, nagkomprotasi sila sa suspek.

“Nakugang siya kay gi-oyog-uyog ang CR, naglalis (sila). Gisultihan sa biktima nganong dili man kahuwat, sinumbagay dayon,” dugang pa ni Nocete.

Apan nalupig ang biktima, siya ang nakulatahan ug nagisi ang iyang kilay. Nanawag sila og police assistance ug pag-abot sa mga otoridad, wala na ang suspek.

Sumala ni Nocete nga adunay dumtanay ang biktima ug suspek hinungdan nga ang gwardiya nipasingit. Human nahibaw-an nga naa sulod sa kasilyas ang biktima, gisamoksamok sa suspek hinungdan nga nagkaaway sila og balik. / GPL, DVG

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph