Wa na madala pa sa tambalanan ang usa ka gidudahan nga tiggamit og illegal drugs nga gipusil sa nag-inusarang gunman sulod sa iyang balay sa Sitio Sawsawan, Brgy. San Roque, Siyudad sa Talisay, alas 11:20 sa buntag sa Huwebes, Enero 11, 2024.
Ang biktima giila nga si Rhamson Lariosa, 31, ulitawo, laborer. Ang lalaki nga mamumuno wa pa mailhi, nagsul-ob og brown stripe t-shirt, nagmaong pants ug nag black face mask.
Sa follow up sa Superbalita Cebu, nasuta sa pasiunang imbestigasyon sa kapulisan nga ubos sa kamanduan sa ilang hepe nga si Police Lt. Col. Wayne Magbanua nga base sa asoy ni Liza Lariosa, inahan sa biktima, nga ang iyang anak diha su’d sa ilang balay. Dunay wa mailhing lalaki nga nagpakaaron ingnong water meter inspector.
Gihangyo ang iyang anak nga mogiya kon asa ang ilang water meter. Apan ang gunman nibunot og armas ug gipusil ang biktima sa ulo nga niresulta sa diha-diha nga kamatayon.
Nagpadayon pa ang imbestigasyon sa motibo ug pag-ila sa killer.