Ang suspek sa pagpatay sa duha ka mga babaye niadtong Enero 3, 2024 sa Bankerohan, Davao City nagbasol pag-ayo sa iyang gihimo ug gibasol ang dautang espirito nga maoy nisulod kaniya.
Gipasabot sa suspek nga si Marcial Gonzales, 52, nga bisan og nangayo siya og pasaylo sa kabanay sa biktima, wala siya’y mahimo kay dili gyud siya mapasaylo.
“Bisan pa og mangayo kog pasaylo, dili na mahitabo nga pasayluon ko, nahimo naman nako... sangko sa langit akong pagmahay, wala napod ko kabalo sa akong nahimo atong mga orasa ,” matod ni Gonzales.
Gitug-an usab sa suspek nga hubog pa siya dihang niuli sa iyang giabangan nga boarding house, ug iyang nakita nga naghigda pa ang mga biktima nga sila si Jessel Joy Casantao Indoy, 15, ug Cora Oral Ansagit, 20.
“Gikuha dayon nako ang kutsilyo sa akong kuwarto dayon gipangdunggab nako sila, wala na gyud ko kabalo sa akong gihimo, mora kog nasudlan og espirito sa satanas,” ingon sa suspek.
Gitug-an usab sa suspek nga siya ang hinungdan nganong nagpuyo sa pikas lawak ang duha ka mga biktima.
“Akoy dahilan diha sila namuyo, kay ako man nag-renta diha, tapos gipapuy-an na lang nako sa ilaha ang pikas kuwarto, tag P15 ang adlaw, nakaila na sila nako sa palengke sa Bankerohan, wala man daw silay mapuy- an,” asoy sa suspek.
Dugang pa sa suspek nga adunay mga gabii nga saba kaayo ang duha ka mga biktima hinungdan nga nasuko siya ilabi na nga anaa ang ilang giingong uyab.
“Ginabadlong nako sila sa ilang kasabaan, labi na og mangdala sila sa ilang mga uyab, pwerteng sabaa,” matod niya.
Niadtong Miyerkules sa gabii, Enero 3, nakig-inom ang suspek uban sa iyang mga kaubang trabahante sa Bankerohan. Si Gonzales nibalik nga hubog sa iyang giabangan.
Human niya patya ang duha, giingnan niya ang mga silingan nga tawagan ang 911.
Gipaubos usab sa autopsy ang mga lawas sa duha ka mga biktima aron masuta kon gimolestiya ba sila tungod kay gihubo ang ubos nga sapot sa usa sa mga biktima, samtang ang usa gihubo usab ang pang-ibabaw nga sapot.
Nasikop ang suspek pinaagi sa joint operation sa mga awtoridad sa Davao Region sa Kapatagan bus terminal sa Digos City, pipila ka oras human sa krimen niadtong Enero 4.
Ang suspek gipasakaan og kaso’ng murder niadtong Enero 5, 2023, sumala ni San Pedro Police Station chief Police Major Marvin Hugos.