‘Killer’ sa brodkaster nadakpan

Nasikop sa kapulisan sa Lunes, Abril 29, 2024, ang nag-unang suspek sa pagpatay kang Misamis Occidental broadcaster Juan “DJ Johnny Walker” Jumalon.

Si PNP chief Public Information Office (PNP) Colonel Jean Fajardo niingon nga si Julito Mangumpit nasikop mga alas 3 sa kaadlawon sa dakbayan sa Dipolog, Zamboanga del Norte.

Matod niya nga si Mangumpit, base sa imbestigasyon sa kapulisan, mao ang gunman nga nisulod sa radio station ni Jumalon ug nipusil kaniya kaduha sa nawong samtang nag-live broadcast niadtong Nobiyembre 5.

Si Fajardo niingon nga si Mangumpit wala pa nitubag sa bisan unsang pangutana kalabot sa pagpatay kang Jumalon.

Si Mangumpit adunay walo ka standing arrest warrants alang sa direct assault, frustrated ug murder nga mga kaso.

Siya niingon nga ang tulo ka mga suspek sa pagpatay kang Jumalon na-account na.

Sa sayo pa, nasikop sa kapulisan ang manag-agaw nga sila si Boboy Sagaray Bongcawel ug Renante Saja Bongcawel, 39, kinsa giingong nagsilbing lookout.

“Case solved po ito dahil sa parameter po ng PNP ang isang kaso ay nako-consider case solved pagka ang suspek ay na identify at napasa-ilalim sa police custody at naisampa ang kaso,” matod ni Fajardo. /TMP, SunStar Philippines