Nitahan sa kapulisan sa lungsod sa Pinamungajan ang duha ka mga suspek sa pagpusil-patay sa magtiayon ug pagkaangol sa ilang anak nga babaye sa Sityo Rattan, Brgy. Sacsac niadtong Martes sa alas 11 sa gabii, Pebrero 6, 2024.
Niadtong Miyerkules sa alas 8:00 sa gabii, Pebrero 7, 2024, ang duha ka mga suspek nga sila si Arnold Villamor Ignario, 43, ug ang pag-umangkon niini nga si Arjie Baron Ignario, 36, pulos taga Sityo Ratan, Brgy. Sacsac, ningtahan sa kapulisan.
GIUNHAN?
Matod ni Arnold nga nahinabi sa Superbalita Cebu, sila nga nanag-inom gibadlong tungod sa kabanha kay lawom na ang gabii.
Matod ni Arnold nga iyang giingnan si Artemio Traya, 48, usa sa mga biktima nga namatay, nga siyay pahinay sa sound system kay iya kini.
Siya nipasangil nga nasuko si Artemio, nibunot og kalibre .45 nga pistola ug gition ngadto kaniya.
Iyang giilog ang pusil apan ug gitabangan siya’g bunal og binugha nila ni Sarlina Traya, 47, asawa, ug anak nga babaye nga si Chyra Traya.
Si Arnold nagkanayon nga sa dihang iyang nailog ang pusil gikan kang Artemio, didto na siya namusil sa mga biktima agi’g self defense.
Pagkahuman, nisibat siya gamit ang motorsiklo ug niangkas kaniya si Arjie Baron pauli sa ilaha sa sityo Proper, Sacsac.
Apan nadisgrasya sila kay natumba ang motorsiklo kay dangog ang dan ug nalabay ang pistola.
Matod ni Arnold nga didto sila nagtago sa kalibunan sa tibuok gabii sa Pebrero 6, ug adlawan sa Pebrero 7.
Apan pagka alas 8 sa gabii, ningtahan ang duha sa kapulisan.
Matod ni Arnold nga ang iyang pag-umangkon way labot sa maong krimen ug mao pa kini nibadlong kaniya nga di mamusil.
Samtang, ang hepe sa kapulisan sa Pinamungajan Major Gilfred Baroman nga gikahinabi sa Superbalita Cebu nagkanayon nga kini ang alegasyon ni Arnold, apan adto na nila tubagon sa korte.
Ang duha ka mga suspek ilang pasakaan og kasong double murder, frustrated murder ug attempted murder.
Ang mga suspek silingan sa mga biktima.
Ang mga biktima gidala sa Pinamungajan District Hospital apan ang magtiayong Traya gideklarar nga dead on arrival (DOA).
Si Chyra nialegar ngadto sa kapulisan nga uban sa iyang kapuyo nga si Charlie Candelasa ilang gibadlong sila si Arnold nga di na magbanha kay lawom na ang gabii.
Apan nasuko kini, niibot og pusil ug unang gipunting si Candelasa, apan wa naigo kay nakadagan samtang si Chyra maoy gisunod, naigo sa tiyan.