Ang Mandaue Kaabag LGBTQIA+ Federation maoy mo-host sa labing dako nga Pride March sa Sugbo karong Hunyo 14, 2025, sa pagsaulog sa Pride Month.
Daghang mga komunidad sa LGBTQIA+ gikan sa tibuok Sugbo ang moapil sa maong kalihukan.
Apil sa mga partisipante ang mga grupo gikan sa Dakbayan sa Talisay, Lungsod sa Camotes, ug ang Philippine Financial Inter-Industry Pride (PFIP) Organization gikan sa BPO Industry.
Kining maong mga grupo nagsugod pag-apil sa parada niadtong 2023 ug gilauman nga moapil na usab karong tuiga.
Ang parada magsugod sa alas 6 sa gabii sa Plaza Presidencia, moagi sa dalan A.C. Cortes, UV Mandaue, ug Mandaue City Health, sa dili pa mobalik sa Plaza Presidencia diin ipahigayon ang programa nga magsugod sa alas 7 sa gabii.
Si Reg Lyn Bihag, presidente sa Kaabag LGBTQIA+ Federation, mipahayag nga malisod ang pag-organisar sa ingon niini nga kalihukan.
Apan, padayon sila sa paghimo sa Pride March matag Hunyo aron sa pagduso sa parehas nga pagtratar hangtod mapasar ang SOGIE Bill.
“Challenging siya kay pila na mi ka years nga nagsige og march for equality and ma-pass pud ang SOGIE Bill nga ginaampo,” matod ni Bihag.
Ang organizers nag-expect og 10,000 ngadto sa 20,000 ka mga partisipante ug mga dinapit nga moapil sa martsa.
Ang komunidad sa LGBTQIA+ sa Mandaue nailhan nga maoy labing una nga nagpahigayon og mga kalihukan sa Pride Month sa rehiyon. /Zenn Dee Tejero, CNU Intern