Wa magduhaduha ang bag-ong kinasal sa pagpadakop sa wedding coordinator igo nga natapos ang selebrasyon sud sa hotel sa Gorordo Avenue, Barangay Kamputhaw, Cebu City niadtong pasado alas 11:00 sa gabii, Huwebes, Hulyo 31, 2025, adlaw sa kasal.
Ang mga biktima nga sila si alyas Carlo, sakop sa Philippine Coast Guard ug bride nga si Denise ang ni-avail sa serbisyo ni alyas Dorothy, wedding planner sa The Bliss Creation Wedding and Events Cebu, sa dihang na engganyo ang kinasal sa nindot nga posting sa social media page sa mga kalihokan nga ilang gidumala.
Sa sayo nga bahin niadtong 2024 nihatag ang mga biktima og P90,000 nga downpayment sa wedding package nga P299,000.
Si Dorothy misaad nga ang iyang events team mao nay moatiman sa sul-obon sa kinasal ug entourage, pagkaon sa reception, simbahan ug make-up artists.
Nihatag na sab og laing installment ang mga biktima hangtod nga ilang gi-fully paid niadtong Hulyo 2, 2025.
Asoy pa sa bride nga mokabat ngadto sa P361,000 kay adunay mga price adjustment nga gipangayo ang suspek.
Nagsugod na og kabalaka ang bride and groom sa dihang ang ilang sul-obonon lakip na sa entourage dili i-release sa bridal boutique tungod kay dili pa kini fully paid sa ilang coordinator.
Tungod sa kabalaka nga way sul-obon ang kinasal napugos sila og bayad og P28,000, aron mahatod na ang bridal gown ug uban pa nianang pagkabuntag sa Hulyo 31.
Nahinayon ang kasal apan nagdoble ang bayad sa kinasal kay aduna pa diay wa mabayri si Dorothy.
KUWARTA GIPA-UTANG
Samtang ang igsuon sa suspek niadto sa reception aron sa pagpangayo og pasaylo ug mipasabot sa mga rason.
Giingong ang pag-umangkon sa suspek gipaubos sa operasyon aron sa pagkuha sa bukol diha sa iyang dughan ug gipahuwam sa suspek og kuwarta ang iyang igsuon aron nga mapa-opera ang anak niini.
Ang bag-ong kinasal nipasalig ngadto sa igsuon sa suspek nga dili sila mokiha sa higayon nga makig atubang personal ang suspek aron husayon ang maong isyu.
Niabot ang suspek sa maong hotel diin naka-check in ang kinasal ug gisaaran nga kalimtan sa mga biktima ang stress nga gihatag niini sa higayon nga iuli niya ang ilang nabayad.
Nisibat na hinuon ang suspek agi sa fire exit sa hotel apan gialerto nang daan ang guwardiya sa establisemento ug gidala ang suspek sa Abellana Police Station 2. / dugang taho ni JDG