Gikumot sa usa ka ginang ang itlog sa kawatan nga nisuway sa paglungkab sa tindahan alas 5:00 sa kaadlawon, Dominggo, Abril 27, 2025, sa Poloy’s Eatery sa N. Bacalso, Barangay Bulacao, Dakbayan sa Sugbo.
Si Jeffrey Tabanao, 23, dunay kapuyo, construction worker, taga Barangay Inayawan gitanggong sa Inayawan Police Station human masikop.
Si Maricel Carticiano, 37, dunay kapuyo, food vendor, taga Sitio Villa Manga, Barangay Bulacao, Siyudad sa Sugbo maoy nakasikop sa suspek inabagan sa mga tanod.
Niasoy si Carticiano sa kapulisan nga natulog siya uban sa iyang kapuyo sulod sa ilang eatery ug nakasulod ang suspek sa tindahan pinaagi sa pagkatkat ug gitangtang ang wooden wall.
Samtang didto sa sulod gikuha sa suspek ang amplifier ingon man duha ka speakers.
Ang mga kinawat gibutang sa suspek sa gawas sa pultahan ug nibalik sa pagsulod kay giapil og kuha ang profane gas.
Apan nakamata si Carticiano ug gibabagan ang suspek hinungdan nga wala na makagawas ug nahitabo ang linayugay.
Nangabot ang mga tanod ug didto sulod sa tindahan nadakpan ang suspek ug gi-turnover sa Inayawan Police Station ug gitakdang pasakaag kasong pagpangawat.
Narekuber ang amplifier mobalor og P6,000, 2 ka speaker kantidad og P10,000.
Ang suspek nga nahinabi sa Superbalita Cebu niangkon sa krimen.
Nangatarungan siya nga gisugo sa iyang mga barkada nga sila si alyas Ricky ug alyas Michael nga taga Inayawan.
Si Ricky ug Michael nakasibat atol sa linayugay ug nakasakay og motorsiklo.
Gibutyag sa suspek nga si Jeffrey nga nisinggit si Maricel ug naglinayogay sila ug nakamata ang kapuyo niini hinungdan nga na-trap siya sa sulod sa eatery.
Kon wala pa kumota ni Maricel ang itlog sa suspek dili gyud unta kini madakpan.
“Gikumot man niya'g maayo akong itlog sakita lagi! Sa kasakit nakasinggit ko, nawad-ag kusog murag napusa akong duha ka itlog” dugang ni Jeffrey.
Sa kakusog sa pagkumot ug pagbunlot, nagisi ang purol ug nayatyat ang brief sa suspek.
“Akong duha ka itlog sir nahubag nasamad gyud kay tag-as mag kuko si Ma’am,” sumala ni Jeffrey.
Gibutyag niya nga iyaha untang surpresahon iyang kapuyo ug duha ka anak atol sa iyang birthday kagahapong adlawa Miyerkules.
Bongga unta kaayo iyang birthday kon wala pa siya madakpi tungod kay maghikay man siya kon mabaligya ang mga butang iyang kinawat kon wala pa siya madakpi.
Nasurpresa gyud tinuod ang iyang asawa tungod sa iyang pagkapriso. / GPL