Usa ka King cobra kun Banakon nasikop sa usa ka manakupay og bitin sa Biyernes sa alas 8 sa buntag sa sityo Libho, Brgy. Salag, bukiran sa lungsod sa Tabogon, amihanang Sugbo.
Kini ang gibutyag ni Glenn Suson, deputy officer sa Municipal Disaster Risk Reduction and Management Office (MDRRMO) sa Tabogon nga gikahinabi sa Superbalita Cebu pinaagi sa telepuno.
Matod ni Suson nga gipahibalo sila sa usa ka eksperto nga manikupay og halas nga si Raul Borgonia nga taga didto ra pod sa maong dapit sa pagkadakop sa Banakon.
Nisulti kanila si Borgonia nga nakit-an sa iyang pag-umangkon ang Banakon nga natulog sa usa ka drainage daplin sa karsada
Kay manikupay og mga bitin kaniadto si Borgonia, sayon ra kini niyang nasikop pinaagi sa pagpiit sa ulo gamit ang usa ka kahoy.
Matod ni Suson nga ilang giadto ang dapit kauban ang personnel sa Municipal Agriculture office ug ilang gikuha ang bitin.
Ila kining gibuhian sa lugar nga daghan og mga kahoy ug layo sa mga balay ug mga tawo kay ginadili man ang pagpatay sa tanang matang sa mga wild animal sama sa halas.
Ang bitin dunay gitas-on nga mga duha ka dupa.
Si Suson nagkanayon nga ang bitin gihulagway nga “adult King Cobra” base sa asoy sa taga agriculture office.