Pormal nga nakasulod sa playoff ang Brgy. Ginebra Gin Kings human nila gipanghubog ang Converge FiberXers, 105-93, sa out-of-town game niadtong Sabado sa gabii, Abril 27, 2024, sa Philippine Basketball Association (PBA) Season 48 Philippine Cup sa Aquilino Pimentel Jr. International Convention Center sa Cagayan de Oro City.
Gawas niini, napaamag sab sa Gin Kings ang ilang paglaum nga makabira og luna sa Top 2 na nagtangag og twice-to-beat nga benepisyo sa quarter-finals.
Napahugtan sa Gin Kings sa kasamtangan ang ilang paggunit sa ikaduhang luna dala ang 7-3 nga rekord sunod sa league-leader San Miguel Beermen, nga adunay 8-0 nga baraha.
Gipangulohan ni Fil-German Christian Standhardinger ang Gin Kings pinaagi sa iyang 33 puntos samtang nidugang og 17 puntos si Maverick Ahanmisi.
Aduna pa’y laing upat ka mga magduduwa ang Gin Kings nga nakahimo og dobleng numero nga puntos.
Ang FiberXers, nga daan na nga wala’y purohan nga makaabante sa nagkaduol nga quarter-finals, nahagbong sa 1-9 nga rekord.
Tinguha unta sa FiberXers nga makabangon og gamay nga garbo sa ilang pagpanamilit apan tataw nga wala sila’y ikasugakod batok sa puwersa sa Gin Kings.
Aduna pa’y purohan ang FiberXers nga makadala og gamay nga garbo sa ilang pagpanamilit pinaagi sa pagpakigbatok sa TNT Tropang Giga sa katapusan nilang tahas.
Ang FiberXers gipangulohan ni Ralph Cu pinaagi sa iyang 32 puntos samtang nihatag og 18 puntos si Justin Arana.
Sa laing duwa, gipatapsingan sa NorthPort Batang Pier ang Blackwater Bossing, 115-113, sa Caloocan Sports Complex.
Gipangulohan ni Arvin Tolentino ang Batang Pier pinaagi sa iyang 27 puntos lakop na niini ang katapusang walo ka mga puntos sa duwa.
Sa kadaugan, nihayaghayag ang purohan sa Batang Pier nga makaselyo og puwesto sa quarter-finals bawon ang 5-6 nga baraha.
Ang Bossing nitidlom sa 3-6 nga rekord. / ESL