Magkumbati sa main game karong Biyernes sa gabii, Enero 17, 2025, ang TNT Tropang Giga ug Brgy. Ginebra Gin Kings sa Philippine Basketball Association (PBA) Season 49 Commissioner’s Cup sa Philsports Arena sa Pasig City.
Ang Tropang Giga maoy usa sa labing init nga mga puwersa sa kasamtangan ug gikan kini sa lima ka sunodsunod nga kadaugan nga nagpasaka sa ilang rekord ngadto sa 5-2.
Sa ilang bahin, ang Gin Kings gikan sa hingpit nga dominasyon batok sa Blackwater Bossing, 86-63, nga nagpasaka sa ilang rekord sa 6-3.
Mahinungdanon kining kombatiha alang sa duha ka kampo alang sa ilang tinguha nga paamagon ang ilang paglaom nga makasulod sa top two nga nagtangag og twice-to-beat nga benepisyo sa nagkaduol nga quarter-finals.
Human sila nasubhan sa komperensya og duha ka mga pilde, ang Tropang Giga kuyaw na og gipakita sa pagpangulo sa ilang dekalidad nga import nga si Rondae hollis-Jefferson.
Apan batok sa Gin Kings, nga aduna sab dekalidad nga import nga si justin Brownlee, ang Tropang Giga kinahanglan mas mokayod og maayo sa tanang mga departamento sa duwa.
Sa pagbalik ni Jamie Malonzo ug pag-abot ni Troy Rosario, gilauman nga mas molig-on ang puwersa sa Gin Kings sa pagpadayon sa ilang kampanya.
Sa premirong duwa, makigbatok ang guest team Hong Kong Eastern batok sa nagsalimoang nga Terrafirma Dyip.
Ang HKE adunay 6-3 nga rekord samtang ang Dyip wala pa nakatilaw og daog sulod sa 10 ka duwa. / ESL