DILI ikalimod nga napamatud-an ni Filipino boxing icon Manny Pacquiao nga sa edad 46, aduna pa gihapon siya’y igong ikabuga human sa ilang away ni World Boxing Council (WBC) welterweight champion American Mario Barrios niadtong Dominggo, Hulyo 20, 2025 (PH time), sa Las Vegas, USA.
Napakyas man tuod si Pacquiao pag-ilog sa korona sa 30-anyos nga si Barrios human niresulta sa majority draw ang ilang away apan iyang napakita nga puwedi pa gyud siya mopadayon sa pag-away alang sa tinguha nga mahimong labing edaran nga boksidor nga makalabni og world title.
Ang pangutana, kinsa kaha ang sunod nga makontra sa Pambansang Kamao ng Pilipinas?
Kon si Pacquiao ang pangutan-on, labing seguro ang laing Amerikanong boksidor nga si Floyd Mayweather Jr. ang mag-una sa listahan.
Dugay na nga nagtinguha ang 8-division world champion nga makigkontra pagbalik ni Mayweather human siya gipilde niini pinaagi sa unanimous decision niadtong Mayo 2, 2015.
Apan kanunay ra nibalibad si Mayweather hangtod nga pareho na lang sila ni Pacquiao nga ningretiro.
Ning pagbalik og away ni Pacquiao, naghandom gihapon kini nga molugnot si Mayweather gikan sa pagretiro ug makig-away kaniya pagbalik.
“Manny is always ready. After that performance last night, you better check with Floyd!” matod pa ni MP Promotions head Sean Gibbons sa interbyu sa Sky Sports.
Nakahisgot sab si Pacquiao human sa ilang away ni Barrios nga gusto siya og dinaliang rematch nga giuyonan sab dayon ni Barrios.
Apan alang sa dugay na nga advisor ni Pacquiao nga si Season Gibbons, adunay mas nindot sunod nga kontrahon ang 8-division world champion kumpara ni Barrios.
Gitumbok ni Gibbons mao ang pulos sab mga Amerikano nga sila si World Boxing Association (WBA) welterweight champion Rolly Romero (17-2, 13KOs) ug WBA lightweight champion Gervonta “Tank” Davis (30-0-1, 28KOs). / ESL