Gisuspenso ang klase sa tanang lebel sa Lalawigan sa Negros subay sa pagsaka sa kaso sa conjunctivitis o piskat.
Kini subay sa giluwatang lagda ni Negros Oriental Governor Manuel Sagarbaria sa Agusto 5, 2026.
Matod sa Integrated Provincial Health Office sa lugar, adunay namatikdang pagsaka sa kaso sa conjunctivitis sa pipila ka mga lugar sa probinsiya diin kinahanglang likayan ang close physical interaction o ang pagtapok-tapok kay kini makatakod.
Ang gipatumang suspension usa ka paagi aron makapahuway ang mga tinun-an ug ang mga school personnel nga nataptan sa maong sakit, ug aron makapa-check up sa labing duol nga tambalanan sa ilang lugar.
Subay niini, gimando ang pagpahigayon sa disinfection ug sanitation measures sa mga tunghaan.
“Parents, guardians, learners, teaching and non-teaching personnel, and the general public are strongly advised to observe proper hygiene and infection prevention measures,
including frequent handwashing, avoiding the sharing of personal items, refraining from unnecessary close physical contact and seeking appropriate medical consultation when symptoms of sore eyes appear,” saysay sa Executive Order No. 50 S. 2026.
Samtang sa Probinsiya sa Sugbo, gipahibalo ni Dr. Nicole Elisse Catalan, Cebu Provincial Health Consultant, nga sa kasamtangan walay natala nga kaso sa conjunctivitis sa mga hospital sa probinsiya.
“So far, on our end no reports from provincial hospitals and no reports from LGUs as of noontime, today,” asoy ni Catalan niadtong Biyernes, Agusto 7, 2026.
Bisan pa niini, nanawagan ang Kagamhanan sa Probinsiya sa Sugbo nga kanunayon ang paghinlo sa kaugalingon aron malikay sa sakit. / ANV
