Mosuway pagkulit og 2-0 nga bintaha ang New York Knicks sa ilang pag-host og balik sa Indiana Pacers ning Huwebes, Mayo 9, 2024 (PH time) sa Game 2 sa ilang Eastern Conference 2nd round playoffs series sa National Basketball Association (NBA).
Ning sangkaa, labing giatangan ang opensiba ni Knicks guard Jalen Brunson, kinsa napatik sa kasaysayan isip ikaupat pa lang nga magduduwa nga nakamugna og 40 puntos o labaw pa sulod sa upat ka sagunsong mga duwa sa playoffs.
Nahimo kini ni Brunson dihang nakatali siya og 43 puntos sa 121-117 nga kadaugan sa Knicks sa Game 1.
Kon maka-40 puntos na sab si Brunson ning duwaa, hayan malabwan niya si Chicago Bulls legend Michael Jordan, kinsa nakasagunson og upat ka 40-point playoff games niadtong 1993. / AP