Lahi na man tuod ang sugilanon sa duwa apan nagmadaugon lang gihapon ang host New York Knicks batok sa Philadelphia 76ers, 108-102, sa Game 2, nga naghatag kanila og 2-0 nga bintaha sa ilang Eastern Conference semi-finals series sa National Basketball Association (NBA) Playoffs kagahapon, Huwebes, Mayo 7, 2026 (PH time).
Ang Knicks, nga yanong ninglampornas sa 76ers, 137-98, sa Game 1, nakasugat og grabe ka kulbahinam nga duwa ning higayuna diin sulod sa 14 ka mga higayon nga nagtabla ang kombati ug 25 ka mga higayon nga nagpulipuli paggunit sa labaw ang duha ka mga kampo.
Gani, pito lang ka mga puntos ang labing dakong labaw nga natali ning sangkaa, 15-8, nga narehistro sa 76ers sa sayong bahin pa lang sa duwa.
Apan wala ra sab magdugay ug nisikit pagbalik ang duwa ug nagpabilin nga ing-ani ang sitwasyon hangtod na sa katapusang gutlo.
Nakaginhawa lang og luagluag ang Knicks dihang naposte nila ang ilang labing dakong labaw, 105-99, sa nahabiling 2:56 minutos.
Human niini, wala na motugot ang Knicks nga mailog pagbalik sa 76ers ang labaw hangtod na sa hingpit nilang kadaugan.
Ang Knicks gipangulohan ni Jalen Brunson pinaagi sa iyang 26 puntos, nidugang og 24 puntos si OG Anunoby, niamot og 20 puntos si Karl- Anthony Towns samtang nitampo og 18 puntos si Mikal Bridges.
Ang 76ers, nga ningkombati nga wala ang ilang pambatong sentro nga si Joel Embiid (ankle ug hip injuries), gipangulohan ni Tyrese Maxey pinaagi sa iyang 26 puntos, ning-amot og 19 puntos matag usa sila si Kelly Oubre Jr. ug Paul George samtang nidugang og 17 puntos si VJ Edgecombe.
Sa West, bangis nga gibawsan sa host San Antonio Spurs ang Minnesota Timberwolves, 133-95, aron tablahon ang kaugalingon nilang conference semi-finals series, 1-1.
Ang Spurs, nga nasugamak sa kulbahinam nga pilde sa Game 1, 104-102, adunay pito ka mga magduduwa nga ningmugna og dobleng numero nga puntos pinangulohan nila ni Stephon Castle (21), Victor Wembanyama (19), ug De’Aaron Fox (16).
Wala’y magduduwa sa Timberwolves ang nakaabot og 13 puntos ning sangkaa. / Gikan sa wires
