Laing kulbahinam ug surpresang daog ang gihimo sa New York Knicks batok sa hosts ug defending champions Boston Celtics, 91-90, sa Game 2 nga maoy nakahatag kanila og 2-0 nga bintaha sa Eastern Conference 2nd round playoffs series sa National Basketball Association (NBA) sa Huwebes, Mayo 8, 2025 (PH time).
Ning sangkaa, ang Knicks hingpit sab nga nakabangon gikan sa 20 puntos nga pagkalubong sama sa ilang nahimo sa ilang overtime nga daog sa Game 1, 108-105, ning best-of-seven series.
Sama sa Game 1, ang depensa sab ni Mikal Bridges maoy nakapakgang sa opensa sa Celtics sa dayong pagkapupos sa oras.
“Just finding ways to win," matod ni Bridges nga napatik sa AP News.
Gikan sa 53-73 nga biya sa ulahing bahin sa 3rd quarter, ang Knicks inanay nga ninggukod hangtod nga nailog nila ang labaw, 91-90, pinaagi sa duha ka freethrows ni Jalen Brunson sa nahabiling 12.7 segundos.
Sa katapusang posisyon sa bola, inanay nga gidala sa usa sa mga pambato sa Celtics ang bola nga si Jayson Tatum ug dihang niaksyon na siya paglusot, napugngan siya sa depensa sa Knicks hinungdan nga naahat siya pagpasa sa bola ngadto unta kang Jaylen Brown.
Apan ning higayuna nahitabo ang laing mabayanihong depensa ni Bridges kinsa nakailog sa bola human sa pagpasa ni Tatum ug napupos na ang oras.
Gipangulohan ni Josh Hart ang Knicks pinaagi sa iyang 23 puntos, nidugang og 21 puntos ug 17 rebounds si Karl-Anthony Towns, niamot og 17 puntos si Brunson samtang nidugang og 14 puntos si Bridges.
Ang Celtics gipangulohan nila ni Brown ug Derrick White pinaagi sa ilang 20 puntos matag usa, nitampo og 13 puntos si Tatum samtang nihatag og 10 puntos si Jrue Holiday.
Puntos matag usa:
New York (91)- Hart 23, Towns 21, Brunson 17, Bridges 14, Robinson 6, McBride 5, Anunoby 5. Boston (90)- Brown 20, White 20, Tatum 13, Holiday 10, Pritchard 9, Porzingis 8, Komet 6, Horford 4. / Gikan sa wires