Makakita pa og laing pagsidlak sa adlaw ang hosts New York Knicks human nila gipangmakmak ang Indiana Pacers, 111-94, sa Game 5 sa Eastern Conference finals series sa National Basketball Association (NBA) ning Biyernes, Mayo 30, 2025 (PH time).
Niini, nakaeskapo ang Knicks sa kaw-it sa panamilit ug ilang napahakan ang bintaha sa Pacers, 2-3, ning best-of-seven series.
Sayo nga niarangkada si Jalen Brunson ug gipangulohan niya ang kadaugan sa Knicks pinaagi sa iyang 32 puntos, lima ka rebounds ug lima sab ka assists.
“Our backs were against the wall. So, I mean, we’ve got to give it everything we got,” asoy ni Brunson, kinsa nirehistro og franchise record nga 21 ka mga duwa sa playoffs diin nakamugna og 30 puntos o labaw pa ang usa ka magduduwa.
Si Karl-Anthony Towns, kinsa niduwa bisan adunay gipamating bun-og sa iyang wa nga tuhod, nipakita nga dili pa siya andam manamilit ug nimugna kini’g 24 puntos ug 13 rebounds aron tabangan ang Knicks.
Sa kadaugan, ang Knicks, nga karon pa nakabalik sa conference finals gikan niadtong 2000, nakabaton og dugang pagsalig sa pagtuman sa ilang intensyon nga mahimong ika-14 nga team nga hingpit nga makabangon gikan sa 1-3 nga biya sa best-of-seven series.
Ning sangkaa, depensa maoy gipalihok og maayo sa Knicks diin ilang nalimitahan og 45 puntos puntos ang Pacers sa 1st half.
Dako kining kalahian atol sa pagkapilde sa Knicks sa Game 3, 121-130, diin nakamugna na og 43 puntos ang Pacers human pa lang sa 1st quarter.
Gawas niini, nalimitahan sab sa Knicks og walo lang ka mga puntos ang lider sa Pacers nga si Tyrese Haliburton, kinsa nagpakatap og rekord sa playoffs nga nga triple-double nga 32 puntos, 15 assists ug 12 rebounds.
Pagsugod pa lang sa duwa, nanginit dayon ang Knicks ug nimugna kini’g 6-0 nga labaw. Adunay higayon nga ningburot sa 20 puntos ang labaw sa Knicks .
Puntos matag usa:
New York (111) - Brunson 32, Towns 24, Bridges 12, Hart 12, Anunoby 11, Robinson 6, McBride 5, Shamet 5, Achiuwa 2, Hukporti 2.
Indiana (94) - Mathurin 23, Siakam 15, Toppin 11, Haliburton 8, Sheppard 8, McConnell 7, Nembhard 6, Walker 6, Turner 5, Nesmith 3, Bradley 2. / Gikan sa wires