Nagkumboya sila si Tyrese Haliburton ug Aaron Nesmith sa krusyal nga bahin aron agakon ang Indiana Pacers sa makapakaging nga overtime nga kadaugan batok sa hosts New York Knicks, 138-135, sa Game 1 sa Eastern Conference finals sa National Basketball Association (NBA) ning Huwebes, Mayo 22, 2025 (PH time).
Naglabaw og 14 puntos ang Knicks, 114-102, sa nahabiling 3:23 minutos sa regulation period dihang nagpauwan og lima ka wala’y sipyat nga three-point shots si Smith nga maoy nakapabangon sa Pacers gikan sa pagkalubong.
Ang katapusang three- pointer ni Nesmith maoy nakapahak og dako sa labaw sa Knicks, 121-123, sa nahabiling 22 ka mga segundos sa regulation.
Sa nahabiling pito ka mga segundos sa regulation, pabiling naglabaw ang Knicks, 125-123.
Human niini, nangita’g paagi si Haliburton aron lutsan ang depensa sa Knicks ug sa dihang nakahigayon, niitsa siya og buzzer-beater sa three-point area diin niuntol pa og taas ang bola human naigo sa ring una kini nasulod.
Nagsaulog ang tibuok puwersa sa Pacers sa pagtuo nga three-pointer ang napasulod ni Haliburton ug nakuha na nila ang kadaugan sa regulation.
Apan sa replay, nasuta nga 2-pointer ra ang napasulod ni Haliburton gumikan kay nakatunob siya og gamay sa linya sa three-point area nga maoy nakatabla sa duwa, 125-125, ug nakapugos sa overtime.
Hinuon human niini, nagkanayon si Haliburton nga nakatutok na siya’g maayo nga makuha nila ang kadaugan sa overtime.
“Then my focus just became winning it,” asoy ni Haliburton nga napatik sa AP News.
Gipangulohan ni Haliburton ang Pacers pinaagi sa iyang 21 puntos ug 11 assists samtang nidugang og 30 puntos si Nesmith lakip na niini ang 8-of-9 three-point shooting.
Ang Knicks gipangulohan ni Jalen Brunson pinaagi sa iyang 43 puntos samtang nitampo og 35 puntos si Karl-Anthony Towns.
Puntos matag usa:
Indiana (138) —Haliburton 31, Nesmith 30, Siakam 17, Nembhard 15, Turner 14, McConnell 10, Mathurin 9, Toppin 8, Bryant 4.
New York (135) — Brunson 43, Towns 35, Bridges 16, Anunoby 16, McBride 9, Hart 8, Payne 6, Robinson 2. / Gikan sa wires