Gihandom sa tibuok kalibutan ang legasiya ug kontribusyon ni basketball legend Kobe Bryant sa gitawag nga 8/24 o Kobe Bryant day kagahapon, Agusto 24 (PH time).
Ang Agusto 24 gideklarar na og Kobe Bryant day nga nasakto pud sa iyang jersey numbers nga 8 ug 24 sa dihang gaduwa pa kini sa Los Angeles Lakers.
Si Bryant kalit nga mitaliwan tungod sa tragic nga helicopter crash niadtong Enero 2020 kauban ang iyang babae nga anak Gianna ug mga pasahero sa helicopter nga mopadulong unta sa basketball clinic.
Giselebrar ang Mamba Day usa ka adlaw human ang birthday ni Bryant sa Agusto 23. Gisaulog pud sa Nike ang birthday week ni Bryant isip “Mamba Week.”
Ang Los Angeles guard nga si Bryant usa sa mga gitawag nga greatest players of all-time, diin miduwa kini og duha ka dekada sa Lakers ug midaog og lima ka titulo.
Wa gyud mobalhin og team si Bryant bisan paman atong panahon nga galisod paglusot sa playoffs ang Lakers.
Usa sa mga memorable nga scoring game ni Bryant mao ang NBA record nga 81 puntos batok Toronto Raptors ug ang iyang 60 puntos sa Farewell Game kontra Utah Jazz. / RSC