Kolurom nga PUJs dakpon sugod karong adlawa

Kolurom nga PUJs dakpon sugod karong adlawa
SunStar Local News GPX

Ang mga operator ug drayber sa tradisyunal nga jeepney nga wala moapil sa mga kooperatiba isip kabahin sa consolidation nga gikinahanglan ubos sa Public Utility Vehicle Modernization Program (PUVMP) maklasipikar nga “colorum” o illegal nga nag-operate sugod karon, Miyerkules, Mayo 1, 2024, ug ang kagamhanan mosakmit sa mga nagbiyahe sa kadalanan ug dakpon ang ilang mga drayber.

Kini ang pahimangno nga gihatag ni Land Transportation Franchising and Regulatory Board Central Visayas (LTFRB 7) Director Eduardo Montealto Jr. sa Lunes, Abril 29, 2024, usa ka adlaw sa wala pa ang Abril 30 nga deadline sa konsolidasyon.

Apan sa kaso sa tradisyonal nga mga jeepney kansang mga drayber ug operator niapil sa konsolidasyon, kini nga mga unit tugotan gihapon nga maka-operate sulod sa 27 ka buwan human sa deadline sa konsolidasyon, matod ni Montealto sa SunStar Cebu.

Matod ni Montealto nga ang allowance nga kapin sa duha ka tuig nagtumong sa pagpasayon sa transisyon ngadto sa hingpit nga integrasyon sa modernong mga jeepney sa pampublikong transportasyon.

Matod ni Montealto nga ang consolidation rate sa pagkakaron anaa sa 89 porsyento sa Central Visayas, nga naglangkob sa mga lalawigan sa Sugbo, Bohol, Negros Oriental ug Siquijor.

Wala niya ihatag ang espesipikong gidaghanon sa tradisyunal nga mga jeepney nga na-consolidated alang sa PUVMP, nga nag-ingon nga ang taho wala pa mahuman.

Dugang pa ni Montealto nga gawas sa mga dili interesadong magkonsolida, ang mga jeepney units nga wala moagi sa proseso mao kadtong wala pa maka-operate ug kadtong dili na mahimong ayuhon.

MAS SAYON

Si Commuter Ivy Ramirez, 24, nga nagtrabaho sa opisina sa usa ka pribadong tambalanan, uyon sa desisyon nga hatagan og dugang panahon ang mga tradisyunal nga jeepney drivers sa pagbyahe sa mga karsada sa dakbayan sa Sugbo human sa Abril 30, niingon nga ang pagdili dayon kanila makadaot sa mga sumasakay nga nagsalig sa pampubliko nga transportasyon, kay “mas barato pa sila kaysa mga modernong jeepney.” Ang minimum nga plitehan sa mga tradisyunal nga jeepney kay P12, samtang sa modernong jeepney, P15.

Ang banker nga si Paul Suarez gikan sa Barangay Subangdaku sa dakbayan sa Mandaue nipalanog niini nga sentimento, nga nag-ingon nga ang tradisyonal nga mga jeepney nagdominar gihapon sa dagkong mga dalan.

Maglisod siya og sakay sa mga modernong jeepney kon itandi sa mga tradisyonal, nga “readily available to accommodate” niya sa iyang pagbiyahe gikan sa balay paingon sa trabahoan sa Cebu City.

Gipasabot ni Suarez nga kadaghanan sa mga modernong jeepney napuno na sanglit nanguha na man sila og mga pasahero gikan sa terminal sa wala pa moadto sa iyang lugar. / KJF

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph