Kompleto na ang gikahinamang mga binukbokay sa “Kumong Bol-anon 15” boxing promotion nga gikatakda karong Abril 30, 2024 sa Holy Name University (HNU) Gymnasium sa Tagbilaran City, Bohol.
Mao kini ang gipadangat nga impormasyon sa nagpasiugda sa kalihukan nga mao ang PMI Bohol Boxing Promotions nga gipangulohan ni Atty. Floriezyl Echavez Podot.
Sa main event, depensaan ni Regie “The Filipino Phenom” Suganob (14-1, 4KOs) ang iyang World Boxing Organization (WBO) Global light flyweight belt batok kang Japanese Kai Ishizawa (11-3, 10KOs).
Sa supporting main event, ang kauban ni Suganob sa PMI Boxing Stable nga si “Sugar” Shane Gentallan makigkinulatahay ni Indonesian Wandi Priman Hulu.
Modugang og lamas sa promosyon mao ang sinumbagay sa babayeng mga boksidor nga sila si Althea Shine Pores sa Claveria, Misamis Oriental batok Renz Dacquel sa Manila.
Ilugan nila ni Pores ug Dacquel ang titulo sa Philippine women’s light flyweight division.
Mokompleto sa mga parisan mao ang tali nila ni Sugarey Leonard Pores batok Roel Julian, Angilou Dalogdog batok Rolan Jay Biendima, Arlando Senoc Jr. batok Kier Torregosa, ug Leonard Pores batok Jaren Jase Guarin.
Nagkantidad ang mga tiket sa promosyon og P200-general admission A, P500-general admission B, ug P1,00-VIP/ringside. / ESL