Giilang high value target sa Philippine Drug Enforcement Agency (PDEA) ug sa kapulisan, nadakpan sa buy-bust ug nakuhaan og mga gituohang shabu nga mokantidad og tunga sa milyon ka pesos.
Napusasan sa nagkahiusang puwersa sa PDEA 7 sa Cebu Provincial Office ug sa kapulisan sa Lungsod sa Dalaguete ang suspek nga drug pusher nga si alyas Johnny, 39, minyo, komprador og utanon sa alas 7:30 sa gabii, Marso 19, 2025, sa Proper sa Barangay Mantalongon.
Sa interview sa Sunstar Superbalita ngadto sa PDEA 7 Team Leader SO III Wenard C. Manzo, nasuta nga ang suspek taudtaod na nilang gipanid-an kay konektado sa ilang mga nadakpan sa buy-bust sa miaging mga bulawan sa Barangay Caleriojan.
Giingong mobaligya og gibanabanang 100 gramos nga timbang sa shabu kada bulan ang suspek sa kabaranggayan sa Dalaguete ug ubang mga kasikbit nga lungsod.
Sa dihang gihimo ang buy-bust, ang drug puseur buyer naggamit og P30,000 nga bogus money nga gipaibabwan og P1,000 nga original nga kuwarta bugti sa usa ka putos sa shabu nga motimbang ngadto sa 10 gramos.
Dihang nadakpan ang suspek, nasakmitan siya sa iyang posisyon og laing 3 ka medium size sa gituohang shabu nga ang tanan motimbang ngadto sa kapin kon kuwang 80 gramos nga may gibanabanang kantidad nga moabot sa P544,000.
Gikuha sab ang cellphone sa suspek nga gituohan nga maoy gigamit sa mga transaksyon.
Ang suspek nadakpan na niadtong 2021 sa susamang kaso ug nipaubos sa probation sa 2022.
Ang dinakpan mag-atubang og kasong paglapas sa Section 5 ug 11 sa Art. II sa RA 9165, o pagpamaligya ug paghupot sa ginadiling drugas. / DVG / AYB