Komprador og utanon napalgang patay human gisikop sa buy-bust
Napalgan nga wala nay kinabuhi kadtong komprador og utanon nga nadakpan sa mga sakop sa Philippine Drug Enforcement Agency (PDEA) 7 didto sa Barangay Mantalongon, bukirang dapit sa Lungsod sa Dalaguete sa lalawigan sa Sugbo.
Ang suspetsado nga si Juan Amarilla Cantilla, 39 anyos, napalgan na lang nga patay na sa pansayan sa custodial facility sa PDEA 7 sa Sitio Sudlon, Barangay Lahug sa Dakbayan sa Sugbo alas 2:20 sa kaadlawon, Sabado, Marso 22, 2025.
Niadtong Marso 19, 2025, nadakpan si Cantilla ug nakuhaan og 80 gramos nga shabu nga mobalor sa P544,000, buy-bust money, ug cellphone.
Sa gipagawas nga pamahayag sa PDEA 7, sila nagkanayon nga usa sa mga inmate sa ilang custodial facility ang mipahibawo sa ilang prison guard sa nahitabo sa suspek sa pansayan.
Dali nga mihimo og first aid ang prison guard ug gi-cardiopulmonary resuscitation (CPR) aron ma-revive ang maong detainee ug nanawag dayon sila og medical assistance.
Ang maong insidente makita kini sa CCTV footage sulod sa pasilidad.
Matod ni Leia Alcantara, information officer sa PDEA 7, nga ang maong hitabo ila nang na-report sa Mabolo Police Station 4 sa Cebu City Police Office ug ang personnel na sa Philippine National Police Regional Forensic Unit 7 ang mikompirmar sa kamatayon niini.
Dunay nakuha nga farewell note ang mga imbestigador nga iya ni Cantilla alang sa iyang pamilya sa Dalaguete nga giduso na ngadto sa PNP Forensic Unit.
Ang patayng lawas niini gidala na sa funeral parlor sa dakbayan sa Mandaue ug gitakdang ipaubos sa autopsy aron pagsusi kon duna bay foul play sa iyang kamatayon.
Ang mga personnel sa PDEA 7 nakigkita na sa pamilya sa suspetsado ug misaad nga andam sila nga mokooperar sa himuon nga imbestigasyon sa kapulisan. / AYB