Kon makit-an gani tika (Human sa malamatong pahiyom)

Sugi-Balak

LEONEL QUILLO

San Fernando, Cebu

Kon makit-an gani tika

ang una nakong mabantayan kay ang imong mga mata.

O ang dagitab sa imong mga mata nga suyupon ang

akong tinan-awan; motan-aw sab ikaw kanako

ug ako, sa pagtutok lang gani kanimo dili na makaako.

Gipangutana ko ikaw, “Unsay imong gusto?”

Wala ka motubag. Mipahiyom ka lang.

Kon makit-an gani tika

ang ikaduha nakong mabantayan kay ang imong buhok.

O ang imong bulagaw nga buhok. Samot na sa imong bangs

O sa imong bangs nga tuyo nimong tagoan.

Palihog sa sunod ayaw na tagoi. Ipakita na lang god

aron sa sunod naa koy ikapasangil kon imong kong masakpan

nga nagtan-aw sa imong mga mata,

Mangutana dayon ko isip palusot, “Nagpa-bangs diay ka?”

Bisan klaro na god kaayo ang tubag sa pangutana.

Kon makit-an gani tika

ang ikatulo dayon nakong mabantayan kay ang imong abaga.

O ang imong abaga. Samot nag mabantangan sa tin-aw

Nga bidlisiw sa hayag nga suga, samot nag basa, nabasa

tungod sa imong singot.

Mangutana dayon ko nimo, “Diin diay ka gikan nga

Nagkadusingot man ka?”

Bisan klaro na god kaayo ang tubag sa pangutana.

Kon makit-an gani tika

ang ikaupat nakong mabantayan kay ang imong kamot

O imong kamot nga gapasnon. Samot nag kuhaon mo

ang imong kinaham nga libro. Magpakli-pakli dayon

ug pangitaon ang katapusang pahina nga imong gibiyaan.

Subayon dayon ug itudlo ang katapusang parapo.

Apan nagtuo diay ka nga namati ko sa imong ideya bahin sa libro?

Ang imong mga tudlo ang akong gitan-aw kaysa mga pahina

O sa mga titik sa pahina: ang mga gagmayng baylerina

nananayaw diha sa panid sa libro.

“Panagsa ra man kaayo mogamit og tuldok si Faulkner sa?”

Kon makit-an gani tika

ang ikalima nakong mabantayan kay ang imong sapatos.

O ang paboritong sapatos. Makapangutana ko sa akong

kaugalingon kon unsa kahay akong bation kon ako

ang maong sapatos? Nga ako ang kanunay nimong kuyog

matag higayon sa imong paglakaw. O mabati ko ba gihapon

ang imong kabug-at bisan dili mo ako isul-ob.

O madungog ko ba ang imong hagok sa kagabhion

sa higayon nga ikaw mopahuway. Kanunay ba gihapon

ikaw nga maghinumdom kanako ug sa imong panumdoman

sa tanang lugar ug kasinatian nga atong dungan nga nasinati.

“Wala matarong og higot imong liston.”

Kon makit-an gani tika

ang katapusan nakong mabantayan kay ang tiket

sa bus nga katapusan nimong gisakyan.

“Diin ka gikan?”

Wala ka motubag. Mipahiyom ka lang.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph