Konduktor sa usa ka publikong sakyanan nadakpan sa buy-bust sa mga sakop sa PNP Drug Enforcement Group (DEG), Special Operation Unit 7, alas 4:45 sa hapon sa Miyerkules, Abril 24, 2024, sa Barangay Subangdaku, dakbayan sa Mandaue.
Ang suspek giila nga si Virgilio Años Jr., alyas Bady, 30, taga dan Avocado, Barangay Mambaling, siyudad sa Sugbo.
Nakuha sa mga operatiba ang mga binulto nga gituohang shabu nga motimbang og 100 gramos nga dunay standard drug price nga P680,000.
Matod sa usa sa mga opisyal sa DEG 7 nga gawas sa pagka konduktor sa suspek, siya usab sugoon sa usa ka drug personality nga naa sa sulod sa jail facility sa paghatod sa ilegal nga drugas.
Duha ka semana nga gipaubos sa monitoring sa kapulisan ang suspek human madawat ang impormasyon gikan sa kasaligang tinubdan.
Duna pay gipangtug-an si Años nga mao unya ang isunod sa follow up operations sa kapulisan sa mosunod nga mga adlaw.
Samtang, usa ka lalaki nga way trabaho nadakpan usab sa buy-bust sa mga sakop sa Parian Police Station, alas 11:30 sa gabii sa Miyerkules, Abril 25, 2024, sa Lower Imus, Barangay Day-as, dakbayan sa Sugbo.
Ang suspek giila nga si Robert Baguio Bicbic, alyas Obet, 25, taga Sityo Beavers, Brgy. Day-as, syudad sa Sugbo nga nakuhaan og pinakete sa gituohang shabu nga motimbang og 5 gramos nga dunay standard drug price nga P34,000. / AYB