Bisan sa panawagan sa umaabot nga administrasyon nga temporaryong suspensuhon ang tanang kalihukan sa pagpamalit ug pag-bidding, ang Konseho sa Dakbayan sa Sugbo, sa ilang regular nga sesyon niadtong Miyerkules, Hunyo 11, 2025, niuyon sa daghang mga resolusyon nga nagtugot sa pagpirma og mga kasabutan sa konstruksyon alang sa nagkadaiyang proyekto sa siyudad.
Si Konsehal Jerry Guardo, kinsa maoy tsirman sa komite sa imprastraktura, maoy nipasiugda sa mga resolusyon, nga naghatag og pagtugot kang Acting Mayor Donaldo Hontiveros sa pagpirma og mga kasabutan sa konstruksyon uban sa lainlaing mga kompanya.
Apil sa mga giaprubahan nga proyekto mao ang pag-ayo sa Fort San Pedro, ang pagtukod og upat ka mga andana nga school buildings sa mga barangay sa Duljo Fatima, Labangon, San Jose, ug Tisa, usa ka pasilidad sa tubig sa Malubog, usa ka covered court sa Labangon, pagsemento sa dalan sa Quiot, ug ang rehabilitasyon sa Multi-Purpose Building sa San Roque.
Apan, sa wala pa aprobahi ang mga resolusyon, si Konsehal Mary Ann de los Santos, kaubang partido ni mayor-elect Nestor Archival ubos sa Bando Osmeña Pundok Kauswagan (BOPK), nanawagan sa konseho nga paminawon ang hangyo ni Archival.
Gibutyag ni De los Santos nga niadtong Hunyo 3, pormal nga nihangyo ang transition team ni Archival sa kasamtangang administrasyon nga temporaryong hunongon ang tanang nagpadayon ug gikatakda nga mga kalihukan sa pagpamalit ug pag-bidding.
"This pause is intended to give the transition team adequate time to review all related documents, procedures, and contracts to ensure alignment with the priorities and governance agenda of the new administration," pasabot ni De los Santos.
Agig tubag, giklaro ni Konsehal Guardo nga nahuman na ang mga bidding alang niining mga proyekto. Ang iyang mga resolusyon igo lang sa pagtugot sa lokal nga chief executive sa pagpirma sa giuna na nga mga kasabutan sa konstruksyon uban sa nakadaog nga mga kontraktor.
Si Konsehal Jocelyn Pesquera, kinsa maoy tsirman sa komite sa turismo, nitutok sa pagkamahinungdanon sa pag-aprubar sa pag-ayo sa Fort San Pedro.
"The restoration of the Fort San Pedro is very vital and very important and this has undergone a lot of approval levels, first with the Chac (Cultural and Historical Affairs Commission), National Historical Institute (NHI)," pasabot ni Pesquera.
Dugang pa niya nga kon undangon ang proyekto karon, hayan magsugod na usab ang taas nga proseso aron matugotan kini sa Chac ug NHI.
"If we stop this, then we will start again from the Chac, NHI, and I would say that again, this is very important because there is a need to improve the Fort San Pedro," pasabot ni Pesquera.
Giklaro ni De los Santos nga ang iyang panawagan gituyo aron mahatagan ang umaabot nga mayor og higayon nga makonsiderar kini nga mga proyekto, tungod kay siya man ang responsable sa pagpatuman niini.
Gitataw niya nga ang iyang baruganan usa ka "manifestation," usa ka legal nga termino sa pagpahibalo sa posisyon sa usa ka partido.
Mahitungod sa proyekto sa Fort San Pedro, gipahayag ni De los Santos ang iyang suporta ug niuyon siya nga ang pag-ayo niini dili makahatag og bisan unsang "kadaot o kasaypanan" sa umaabot nga administrasyon.
"If this has no harm and no foul, well, I accede to this but this is only an appeal as far as this new administration is concerned just to give reference to the mayor," batbat ni De los Santos.
Bahin sa school buildings, gipahayag ni Pesquera ang iyang pagsalig nga si mayor-elect Archival mosuporta sa sama niini ka mahinungdanon nga mga proyekto sa imprastraktura.
"I'm just manifesting, Mr. Chair," yanong pagsubli ni De los Santos kabahin sa iyang gipanulti. / JPS