Nailhan na sa Police Regional Office (PRO 7) kon si kinsa ang amo ni Harvey Torres, lalaki nga nakuhaan og 10 kilos nga gituohang shabu nga mokantidad og P68 milyunes sa President Roxas St., Villa Aurora, Brgy. Kasambagan, dakbayan sa Sugbo sa Lunes sa gabii, Disyembre 11, 2023.
Matod ni Police Lt. Colonel Gerard Ace Pelare, spokesperson ni Police Brigadier General Anthony Aberin, hepe sa PRO 7, nga gawas sa pagtug-an ni Torres kon kinsa ang iyang amo, iya usab nga gibutyag atol sa custodial debriefing kon kinsa ang iyang local contacts dinhi sa Sugbo.
Hinuon wa na nidetalye og maayo sa Pelare tungod kay makaapekto kini sa ilang follow-up operations.
Nailhan na sa kapulisan kon kinsa ang iyang local contacts, nagpasabot nga sub-sub unya ang mga follow up operations.
Matag semana giingong mobiyahe si Torres diin magdala og kinilo nga shabu nga iya usab nga ipang apod-apod sa mga drug pusher.
Padayon ang gihimong intelligence monitoring sa PRO 7 uban sa counterpart niini sa kaulohan sanglit sila nagtuo nga ang drug personalities labi na kadtong dagkong player mangita og lain nga paagi nga makalusot ang ilang supply sa Central Visayas.