Moretiro og sayo si kanhi world champion Japanese Ginjiro Shigeoka human sa pagkapilde niini pinaagi sa split decision sa ilang rematch ni International Boxing Federation (IBF) minimumweight champion Filipino Pedro Taduran niadtong Mayo 24, 2025, sa Intex Arena sa Osaka, Japan.
Ang pagkahuman og sayo sa boxing career sa 25 anyos nga si Shigeoka opisyal nga gianunsyo sa Japan Boxing Commission (JBC).
Grabe ang binukbokay nila ni Taduran ug Shigeoka sulod sa 12 ka rounds apan human gianunsyo ang resulta, nakuyapan si Shigeoka samtang naglingkod sa iyang corner ug gi-stretcher kini aron mahatod sa ospital
Gipaubos si Shigeoka sa emergency brain surgery.
Sa lagda sa JBC, ang boksidor nga moagi og brain surgery dili na tugotan nga makaaway og balik.
Sa kasamtangan, si Shigeoka nagpabilin sa intensive care unit (ICU) ug padayon kining giobserbahan sa usa ka ospital sa Osaka.
Si Shigeoka moretiro nga bawon ang 11-2, 9KOs nga rekord samtang si Taduran, 28, mopadayon sa iyang karera dala ang 18-4-1, 13KOs nga rekord. / ESL