Usa ka contractor nga giingong nag-sideline sa pagpamaligya og ilegal nga drugas uban sa iyang mga sinaligan diin usa niini babaye, nadakpan sa gilusad nga buy-bust sa Loon Municipal Police Station sa Bohol Police Provincial Office (BPPO) sa Martes, Agusto 5, 2025, sa Purok 2, Barangay Talisay, Cabilao Island, Lungsod sa Loon.
Ang mga nadakpan giila nga silang Mark Louis Maratas, 45, target sa kapulisan sa Loon, Romel Gulayan, 42, mananagat ug Mialiajean Maratas, 32, igsuon sa contractor nga pulos nagpuyo sa maong lugar.
Nakuha gikan kanila ang upat ka bulto ug duha ka medium size nga putos sa gituohang shabu nga motimbang og 210 gramos nga mobalor sa P1.4 million.
Ang Loon Police Station sa pagpangulo sa hepe niini nga si Police Captain Thomas Zen Cheung, naka-monitor sa ilegal nga kalihukan sa mga suspek.
Kalapasan sa Section 5 ug 11, Article II, Republic Act 9165 ang ipasaka nga kaso sa kapulisan batok sa mga suspek. / AYB