Nag-atubang karon sa dakong kontrobersiya ang mga opisyal sa Department of Engineering and Public Works (DEPW) ug City Engineer’s Office human gipaimbestigar ang kapin P432 milyunes nga infrastructure project nga walay mga teknikal nga dokumento.
Pormal nga giduso ni Konsehal Jose Lorenzo Abellanosa ang usa ka resolusyon aron imbestigahon sa City Council Committee on Infrastructure ang DEPW, City Engineer’s Office, ug uban pang nalambigit nga mga opisyal.
Nitingog ang konsehal human gipagawas sa Commission on Audit (COA) ang ilang nadiskubrihan nga wala gihapon gitugyan sa siyudad ang mga importanteng teknikal nga dokumento sa maong mga proyekto.
Kini bisan kaduha na sila gipadad-an og pormal nga hangyo, una niadtong Agusto 2025 ug gisundan niadtong Marso 2026.
Apil sa mga papeles nga wala mapakita mao ang Detailed Unit Price Analysis (Dupa) ug Bill of Quantities, Breakdown of Contract Costs ug Variation Orders, PERT/CPM network diagrams ug kompleto nga set sa mga naaprobahang plano ug drawing.
Tungod sa kakuwang sa mga dokumento, nalangan ang pagsusi sa COA.
Dili na hinuon masuta sa mga auditor kon sakto ba ang presyo sa proyekto, kon tukma ba ang mga timeline, ug kon gitarong ba sa pagpatuman ang procurement sa miaging administrasyon.
Gipahinumdoman ni Abellanosa ang tanan nga ang "public office is a public trust."
Gisugyot sa konsehal nga ang DEPW ug ang City Engineer’s Office, makig-coordinate sa Bids and Awards Committee, magsumiter sa mga nawala nga mga dokumento ngadto sa COA, ug maseguro ang pagtuman sa mga kinahanglanon sa pag-audit sa umaabot. / CAV