Sa ikaduhang higayon, suwayan sa San Miguel Beermen paglabni ang kampyunato sa ilang pagpakigbatok og balik sa TNT Tropang 5G karong Biyernes sa gabii, Hulyo 25, 2025, sa Game 6 sa Philippine Basketball Association (PBA) Season 49 Philippine Cup Finals series sa Philsports Arena.
Sa ikaduha sab higayon, suwayan sa Tropang 5G pagpakgang ang tinguha sa Beermen aron magpabiling buhi ang ilang paglaom alang sa talagsaong Grandslam title.
Sa premirong pagsuway sa Beermen sa paglangkat sa korona, gisanta sila sa Tropang 5G, 78-86, sa Game 5 niadtong Miyerkules sa gabii, Hulyo 23, nga maoy nakapahak sa ilang labaw sa best-of-seven series, 3-2.
Ning sangkaa, wala’y mausab sa mentalidad sa Tropang 5G – padayon sa pagpakigkombati, padayon sa pagtuo ug padayon sa pagsalig.
Nagkanayon si TNT coach Chot Reyes nga nakita niya sa iyang mga magduduwa hilabi na si Brandon Ganuelas-Rosser atol sa Game 5 nga dili pa kini andam mosurender ug nagdilaab ang tinguha nga maangkon ang Grandslam title.
Gidayeg ni Reyes ang iyang mga batos tungod niini.
“I saw a lot of fight (from the players) and just an unwillingness to give up,” asoy ni Reyes nga napatik sa www.pba.ph.
“Our pre-game talk was all about having a very, very long season and now we’re in the final week, I told them to make it the best week, let’s fight as hard as we can.”
Sa ilang bahin, ang Beermen seguradong mopagawas sa tanan nilang kaisog aron mahuman na ang series ning duwaa gumikan kay mobalit-ad ang momentum kon moabot sa deciding Game 7 ang series.
Game 5 boxscores:
TNT (86) – Ganuelas-Rosser 18, Williams 14, Oftana 13, Heading 13, Vosotros 11, Pogoy 11, Aurin 4, Khobuntin 2.
San Miguel (78) – Cruz 20, Lassiter 15, Fajardo 13, Tautuaa 9, Trollano 8, Ross 6, Perez 5, Rosales 2. Quarters: 27-20; 41-31; 59-53; 86-78. / ESL