Korte gihulga nga bombahan

Korte gihulga nga bombahan
Contributed photo

Gipagawas ang tanang mga empleyado ug mga kliyente sa Cebu City Hall of Justice human ang Regional Trial Court Branch 16 sa Qimonda Building sa North Reclamation Area, dakbayan sa Sugbo nakadawat og usa ka bomb scare, pasado alas 9:00 sa buntag sa Lunes, Pebrero 12, 2024.

Matod ni Police Lieutenant Colonel Janette Rafter, deputy city director for operations sa Cebu City Police Office (CCPO), nga si Police Colonel Ireneo Dalogdog, hepe sa CCPO, nakadawat og forwarded message labot sa matod pa bomba nga gibutang sa usa sa government agencies ug mobuto sa alas 3:00 sa hapon.

Tungod niini, ang seguridad sa Cebu City Hall of Justice daling gihatagan og pagtagad sa kapulisan.

Daling nipadala og personnel ang Mabolo Police Station sa pagpangulo ni Major Romeo Caacoy ug Explosives and Ordnance Division (EOD).

Gilusad dayon ang pagsusi sa establisemento ug nasuta nga wala’y bisan unsa nga butang nga makamugna og kadaut sa katawhan sa lugar.

Nihimo na sa ilang imbestigasyon ang kapulisan sa dakbayan sa Sugbo kon kinsa ang nagpaluyo sa pagpang hulga.

Kon mailhan kini, mag-atubang kini og kaso nga kalapasan sa Presidential Decree 1727 o Anti-Bomb Joke law.

Kahinumdoman, ma­ka­dag­han na makadawat og samang hulga ang Qimonda Building ug walay gikataho nga napasakaan og kaso nga responsable sa pagpanghulga.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph