Giawhag sa Philippine Constitution Association Inc. (Philconsa) ang Korte Suprema nga usbon ang nauna nga desisyon niini nga nagdeklarar nga dili konstitusyonal ang mga artikulo sa impeachment batok ni Bise Presidente Sara Duterte.
Sa pamahayag nga gipirmahan ni Philconsa Chairperson ug retiradong Chief Justice Reynato Puno nga ang Korte Suprema nitakda og bag-ong mga lagda sa pagpatuman sa impeachment, nagtugot sa korte sa dili angay nga gahum aron nga “hikawan ang
Kamara sa eksklusibong katungod sa pagpasiugda sa tanang kaso sa impeachment,” nga kalapasang sa Article XI, Section 3 sa Konstitusyon nga nagtugot sa maong katungod ngadto sa House of Representatives.
Gipasabot sa Philconsa nga ang Korte Suprema “dili usa ka trier of facts” ug adunay tahas sa paghubad sa balaod kon aduna nay naestablisar nga ebidensiya.
“We call on the Supreme Court to avoid the political thicket, where there are too many unknowns and unknowables, and thus avoid the tyranny of intangibles,” matod pa sa Philconsa.
“We therefore urge the Supreme Court to review the salient facts it relied upon in its decision to make sure the facts speak the truth, for only a decision based on indubitable facts can stand time and its vicissitudes,” dugang niini.
Gipadayag sab sa Philconsa ang kabalaka sa desisyon sa Korte Suprema nga nagpahamtang og pito ka bag-ong mandatory nga mga lagda nga kinahanglan sundon sa House of Representatives sa higayon nga mopasiugda sa reklamo sa impeachment.
Gipasiugda sa grupo nga ang panginahanglan sa due process sa Kamara sa paglakip og igo nga ebidensya sa mga artikulo sa impeachment ug sa paghatag og igo nga panahon sa pagdesisyon kon suportahan ba ang reklamo, mahimong gamiton sa gipasanginlan nga opisyal aron dalhon ang isyu ngadto sa Korte Suprema.
Matod sa Philconsa, kini nga mga rekisito epektibong nitugot sa Korte Suprema sa paghukom kon igo ba ang ebidensya ug kon makatarunganon ba ang panahon nga gihatag sa mga miyembro sa Kamara sa paghimo og ilang kaugalingong desisyon. / TPM / SunStar Philippines