Gipaubos sa arraignment kon gibasahan sa iyang kaso kadtong kritiko ni Lapu-Lapu City Mayor Junard ‘Ahong’ Chan nga si Humprey Elvira uban sa iyang abogado sa Regional Trial Court (RTC) Branch 27 sa Lapu-Lapu-Lapu City Hall of Justice, Miyerkules, Pebrero 19, 2025.
Si Elvira gireklamo og mga kasong cyber libel nga kalapasan sa Cybercrime Prevention Act of 2012 .
Atol sa proceedings adunay mga ebidensiya nga giduso batok sa sinumbong, lakip na ang mga pamahayag gikan sa mga saksi ug uban pa nga mga dokomento.
Si Elvira, usa ka tattoo artist ug administrator sa Facebook page ‘Kamatuoran sa Opon,’ naila sa iyang pagpadayag og mga pagsaway sa administrasyong Chan.
Niadtong Oktubre 2024 ang mayor nisang-at og five counts sa reklamong cyber libel batok ni Elvira, base sa iyang mga online posts nga gihulagway nga malisyuso ug nagdaot sa dungog sa reklamante.
Laing reklamo ang gisang-at niadtong Nobiyembre 2024 nga giduso sa Barangay Kapitan sa Canjulao Rufo Bering ug city hall personnel nga si Louie De Los Santos.
Si Elvira nitahan sa iyang kaugalingon niadtong Pebrero 3, 2025 human nga nalutsan og arrest warrant.
Sa naunang pamahayag, si Elvira masaligon nga mabasura ang maong mga reklamo batok niya tungod kay ang iyang mga pamahayag nga gi-post online kabahin sa freedom of speech ug wa siyay tinguha nga moguba sa pagkatawo sa mayor. /DPC