Ang National Bureau of Investigation sa Central Visayas (NBI) 7 nipasaka og kaso’ng kriminal batok sa usa ka Facebook user tungod sa giingong pagpakatap og peke ug defamatory statement nga gipasangil ni Mandaue Lone District Rep. Emmarie “Lolypop” Ouano-Dizon kalabot sa P20 milyunes nga Maguikay skywalk.
Ang reklamo nga gisang-at niadtong Abril 10, 2025, nag-akusar kang Redmon Colina, residente sa Barangay Centro, Dakbayan sa Mandaue, og mga kalapasan sa Republic Act 10175 o ang Cybercrime Prevention Act of 2012, ilabina alang sa "computer-related forgery" ubos sa Section 4(b)(1), ug "cyber libel" ubos sa Section 4(c)(c)(4).
Sumala sa press release sa NBI 7, si Colina "nag-post og daghang mga malaw-ay nga mensahe ug mga hulagway sa lainlaing mga petsa ug okasyon" ubos sa iyang Facebook account, ug kini nga mga materyales "gidirekta batok kang Congresswoman Emmarie 'Lolypop' Ouano-Dizon."
Lakip sa maong mga post, ang labing inila ug kontrobersyal mao ang gimaniubra nga quote card nga nagpakita sa hulagway ni Ouano-Dizon, ang selyo sa House of Representatives, ug usa ka pamahayag nga nag-ingon: “Kon wala mo nalipay sa 20 million nga Skywalk ayaw mo ug agi diha. Para ra na sa mga Mandauehanon nga kahibaw mo-appreciate sa akong project.”
Kining maong post gihulagway sa NBI nga “malicious and fabricated.” Gitug-an sa NBI 7 nga si Colina ug ang iyang abogado nipatim-aw sa ilang buhatan, diin siya niangkon nga maoy tag-iya sa Facebook account ug nag-post sa sayop nga hulagway.
Niingon ang NBI 7 nga ang lakang nga ilang gihimo nahisubay sa baruganan sa Department of Justice ug National Bureau of Investigation sa pag-prosecute sa fake news online, partikular sa mga paningkamot nga mapanalipdan ang publiko gikan sa mga kriminal nga kalihukan nga adunay kalabotan sa paggamit sa internet. / CAV