Nasinati ang Sinulog vibe sa mga guest ilabi na sa mga balikbayan nga ningsaksi sa tinuig nga Balik Cebu event nga gipahigayon sa Ayala Center Cebu sa Huwebes, Enero 18, 2024.
Ang Balik Cebu gipaluyohan sa Ayala Center Cebu ug Balik Cebu Committee sud na sa 22 ka tuig, nga moabi-abi sa mga balikbayan gikan sa nagkadaiyang mga suok sa kalibutan nga tuyo nga mipauli sa Cebu alang sa kapistahan ni Señor Sto. Niño.
Ang maong kalihukan gisuportahan sab sa Cebu City Government diin personal nga ning-welcome sila si Mayor Michael Rama, Vice Mayor Raymond Alvin Garcia ug mga sakop sa City Council. Ang tanan ningtambong.
Ang dinner show nga gipahigayon sa The Terraces sa Ayala Center Cebu adunay live musical performances, diin giawit ang Visayan songs, samtang nangaon ang mga bisita sa lamian nga luto nga Sugboanon, dance showdown sa Lumad Basakanon ug naa sab ang Ms. Cebu 2024 winners.
Ang Balik Cebu 2024 nagsilbi nga pasiuna lang sa mga kalingawan nga masaksihan hangtod sa Sinulog Grand Parade sa Enero 21.