Dali ra kaayong naka-adjust ang beteranong forward nga si Calvin Abueva sa bag-o niyang team nga mao ang NorthPort Batang Pier.
Sa ikaduha pa lang niyang duwa sa NorthPort, si Abueva nimugna og 19 puntos, walo ka rebounds, upat ka assists ug lima ka steals aron tabangan ang Batang Pier sa pagbuntog sa NLEX Road Warriors, 113-108, niadtong Miyerkules, Hunyo 11, 2025, sa Philippine Basketball Association (PBA) Season 49 Philippine Cup.
Gipasabot ni Abueva nga wala ra siyay nakitang makapakugang sa iyang nahimo tungod kay aduna man siyay mas taas nga playing time sa NorthPort kumpara dihang nagduwa pa siya sa Magnolia Chicken Timplados Hotshots.
“Ganun naman talaga ang laro ko kung maglalaro ka talaga sa loob. Pero kung nasa labas (ka), hindi mo makukuha yung minuto at score mo na ganun,” matod ni Abueva nga napatik sa www.pba.ph.
Sa premiro niyang duwa sa NorthPort, nimugna si Abueva og 18 puntos, pito ka rebounds, ug tulo ka assists apan napilde ang Batang Pier ning kombatiha batok sa Phoenix Super LPG Fuel Masters, 107-118.
Daw nakalitan si Abueva sa taas nga playing time nga gihatag ni coach Bonnie Tan ngadto kaniya isip usa ka starter ug nakasinati siya og cramps human sa kadaugan sa Batang Pier batok sa Road Warriors.
“Namulikat ako, nabigla ata ako sa minuto,” matod ni Abueva kinsa nagduwa sulod sa 35 ka minutos ning kombatiha.
“Pero siyempre, start pa lang ng conference. Hindi start, e. End ng conferece, e. Bawi na lang next conference.”
Wala na man tuod paglaom ang Batang Pier nga makasulod sa quarter-finals, gipadayag ni Abueva nga kuntento kaayo siya sa bag-o niyang team.
“Para kaming nag-semis. Last two games namin, nakuha namin yung isa,” dugang Abueva.
Ang Batang Pier nga adunay 2-8 nga rekord, aduna pay nahabiling usa ka duwa sa elimination batok sa San Miguel Beermen ugma, Dominggo, Hunyo 15. / ESL