Kwarta nga isweldo gisugal sa casino; suspek gipadakop

TAMPO
POSAS: Si alyas Jovanni, 35, gidakop sa mga sakop sa Abellana Police Station human siya gireklamo sa iyang kompaniya nga wa gihatod ang tukmang kantidad sa kwarta sa tseke nga gipa-encash kaniya. Giingon nga gisugal kini ni Jovanni sa casino human nipa-encash sa tseke. / TAMPO

Nadakpan sa manhunt ope­ration sa Abellana Police Station sa Cebu City Police Office (CCPO) ang usa ka liaison officer ug kasamtangan nga collector sa usa ka security agency nga nahimutang sa 2nd floor, Albulario Bldg., General Maxilom Avenue, Dakbayan sa Sugbo alas 3 sa Biyernes sa hapon, Hunyo 14, 2024 sa kasong qualified theft.

Ang suspek mao si alyas Jovanni, 35, taga Sitio Dao, Brgy. Malubog, bukirang dapit sa Dakbayan sa Sugbo.

Nidangop sa Abellana Police Station ang representante sa Gaprotec Security Inc. nga si alyas Roel, operations manager sa maong security agency, aron isumbong ang gibuhat ni Jovanni kay gikuha ang kwarta nga balor og P379,571.50 nga alang unta sa isweldo sa ilang mga gwardya.

Gisugo, matod pa, si Jovanni sa alas 11 sa buntag niadtong Huwebes, Hunyo 13, 2024 sa pagpa encash sa upat ka commercial checks nga mobalor og P543,329.50.

Apan wala na nibalik sa maong adlaw si Jovanni inay pagkaugma na nitunga sa opisina.Dala niini ang kwarta nga mobalor na lang og P163,758 ug daling milakaw nga wala na nibalik.

Human sa pag report sa manager, gilusad dayon ang manhunt operation ug ila ning naabtan sa balay niini sa Malubog.

Wala na makuha pagbalik ang P379,571.50 kay matod pa sa suspek nahurot kini sa iyang pagpanugal sa casino.

Kasong qualified theft ang ipasaka sa Abellana Police Station batok sa suspek ug desidido ang management sa pagkiha. / AYB

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph