Sa labing unang higayon nga nakapalta og duwa si LeBron James sa 2024-25 National Basketball Association (NBA), nagbangis ang hosts Los Angeles Lakers ug ilang gipangmakmak ang Portland Trail Blazers, 107-98, kagahapon, Lunes, Disyembre 9, 2024 (PH time).
Nagkumboya sila si Anthony Davis, D’Angelo Russell ug Rui Hachimura aron tapakan ang dakong haw-ang nga nabiyaan ni James kinsa adunay angol (left foot contusion).
Nagpakatap si Davis og 30 puntos ug 11 rebounds, nidugang og 28 puntos ug 14 assists si Russell samtang niamot og season-high 23 puntos si Hachimura.
Si James kinsa kanhi four-time MVP, gilista nga posibleng makaduwa sa sayo pa apan opisyal kining gilista nga dili makaduwa, 30 ka mga minutos una ang jumpball.
“We found out LeBron was out right before the game so the coaches told me I had to step up tonight,” matod ni Hachimura. “I was ready for it. As a team, we were moving the ball well. (Russell) was great.”
Wala nihatag og pamahayag sa media si James kinsa nag-average og 23 puntos, 9.1 assists ug 9.0 rebounds sa nag-unang 23 ka mga duwa sa Lakers.
Ang Lakers nga nakabangon gikan sa tulo ka sunodsunod nga kapildihan, nisaka sa 13-11 nga rekord.
Gawas ni James, wala sab ang laing sinaligan sa Lakers nga si Austin Reaves kinsa nakapalta na og lima ka sunodsunod nga duwa kay nagpaalim pa sa iyang angol (left plantar fasciitis).
Ang Trail Blazers nga nahagbong sa 8-16 nga rekord, adunay lima ka mga sakop nga ningposte og dobleng numero nga puntos pinangulohan sa 19 ni Shaedon Sharpe. / AP