L.A. Lakers gipaig sa Nets

ILOG SA BOLA: Midayib sa salog si Brooklyn Nets guard Dennis Smith Jr. aron makuha ang bola samtang si Los Angeles Laker forward LeBron James galantaw (tuo). / Hulagway sa AP
ILOG SA BOLA: Midayib sa salog si Brooklyn Nets guard Dennis Smith Jr. aron makuha ang bola samtang si Los Angeles Laker forward LeBron James galantaw (tuo). / Hulagway sa AP

Nakatilaw na pud og laing pilde ang Los Angeles Lakers sa ila mismo’ng korte human girapido sa Brooklyn Nets, 130-112, sa Crypto.com Arena sa California sa National Basketball Association (NBA) regular season game sa Sabado, Enero 20, 2024 (RP Time).

Giaswat ni Cam Thomas ang Nets gamit ang 33 puntos aron tapuson ang ilang upat ka sunodsunod nga mga pilde ug masakmit ang ikaupat nga daog sulod sa 18 ka mga duwa.

Gikan ang Nets sa sakit nga sunodsunod nga kapildehan kontra Miami ug Portland diin gipatapsingan sila sa overtime ug sa buzzer-beater shot. Maong naniguro ang Nets nga makabentaha sa second half sa korte sa Lakers.

Niburot ngadto sa 23 puntos ang labing dako nga labaw sa Nets sa uwahing bahin sa fourth quarter.

Niamot si Nic Claxton og 22 pun­tos lakip na ang 14 ka rebounds, samtang si Spencer Dinwiddie nitunol og 19 puntos, 13 niini gibuhat sa third quarter diin gi-outscore sa Nets ang Lakers, 38-22.

Ang Lakers gipangulohan ni bigman Anthony Davis nga nitali og 24 puntos ug 12 ka rebounds, samtang ang beteranong si LeBron James nakahimo og 24 puntos gikan sa parat nga 9-for-22 shooting sa field, lakip na ang upat ka turnovers.

Ang Lakers naay rekord nga 7-13 (win-loss) sukad nila madaog ang NBA In-Season Tournament, ang maong rekord third-worst sa Western Conference.

Sa overall standing, gawas gi­hapon sa playoff spot ang La­kers bitbit ang 21-22 nga rekord ug anaa sa ika-10 nga pwesto sa Western Conference.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph