Lab-asera gibunalan, gitulis; P40K nakuha

Toledo City, Cebu.
Toledo City, Cebu. (Google Maps)

Usa ka lab-asera’g isda gitulis alas 2:40 sa kaadlawon, Dominggo sa Sitio Dasuga 3, Barangay DAS Lutopan, dakbayan sa Toledo.

Ang biktima mao si Lycel Necesito Bolo, 34, fish vendor, residente sa naasoy nga dapit.

Apan ang nahitabo kaniya ala 6:30 na sa buntag na-report sa kapulisan.

Nakasibat na ang suspek nga si Genesis Tagsip, hingkod ang panuigon, lumad sa Butuan, Lanao del Sur sa Mindanao.

Sumala sa kapulisan, ang suspek dunay uyab sa maong lugar kaniadto hinungdan nga niabot sa dapit.

Si Senior Master Sgt. Ramonito Canasa, imbestigador sa Toledo City Police Station nga nahinabi sa SunStar Superbalita Cebu, nagkanayon nga nadala sa suspek ang P40 mil cash, kwentas nga gold nga mobalor og P27,000.

Matod ni Canasa, ang biktima naglakaw padulong nag­pa­abot sa drayber aron mangumpra apan pag-abot sa ngitngit nga dalan, gibunalan ang ulo sa biktima.

Gamit sa suspek ang bat nga kahoy nga nabali ug kini nabilin lakip sa sinilas sa suspek sa crime scene.

“Ang handle sa bat sa marble gun na-identify sa tag-iya sa balay nga gisak-an sa suspek. Unya sa pagdalidali nahabilin ang duha ka tsinelas,” dugang ni Canasa.

Dugang ni Canasa, ang suspek giingong gibuwagan sa hinigugma ug nanghayo nga mopuyo sa usa ka panimalay.

Naluoy ang tagbalay nakapu­yo gyud og dugay apan human gipahibalo nga dili na papuy-on, nipalakaw sab kinig estorya nga mouli na sa Mindanao kay namatay ilang kaliwat.

Sumala ni Canasa nga giplano nang daan sa suspek nga target sa pagtulis ang biktima kay nahibalo sa oras paggawas sa kaadlawon kay mangumpra’g isda.

Ang drayber sa biktima natingala nga wala naabot human gitawgan.

Gisugat kini nakugang kay nakit-an ang biktima nga nagkadugo ang ulo. / GPL

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph