Gipasiugdahan sa Cebu Technological University (CTU) ang pirmahanay sa Memorandum of Agreement (MOA) uban sa Barangay Ermita, Department of the Interior and Local Government (DILG) Cebu City, ug CVCCO Multipurpose Cooperative niadtong Hunyo 27, 2025, sa buhatan sa Presidente sa CTU Main Campus, isip pormal nga pagsaulog sa ikaduhang tuig sa Wellness and Outreach for Menopausal Empowerment and Nurturance (W.O.M.E.N.) Project nga mao ang labing unang menopause-focused nga programa sa tibuok Pilipinas.
Ang maong proyekto gitumong sa kababayen-an sa Barangay Ermita, Dakbayan sa Sugbo nga nakasinati na sa menopause, nga usa ka yugto nga kasagarang maglakip og hot flashes, depresyon, kalisang, ug pagkawala sa kumpyansa sa kaugalingon.
Tumong niining maong inisyatibo ang pagtabang sa kababayen-an nga masabtan, matabangan, ug mapalig-on ang ilang mental ug pisikal nga kahimtang.
Gipangulohan ang pirmahanay ni CTU President Dr. Joseph C. Pepito, kauban ni Barangay Ermita Chairman Hon. Rizaldy Miral, Department of the Interior and Local Government (DILG) Cebu City Director Dr. Neila Aquino, ug CVCCO Multipurpose Cooperative Chairman Mr. Victoriano T. Pagador nga girepresentahan ni Board Member Ms. Sabina Utlang.
Apil sab sa kalihukan ang mga opisyal sa CTU Main ug ang Presidente sa Ermita Kababaye-an nga si Ms. Esterlita Aparis.
Gipasabot sa project leader sa W.O.M.E.N. nga si Dr. Reah Fabrica nga ang tibuok katuyuan sa proyekto mao ang pagtukod og panaghiusa sa komunidad aron suportahan ang kababayen-an nga niagi sa menopausal stage, pinaagi sa paghatag kanila og kahayag ug kasayuran uban ang respeto ug pagsabot.
PADAYON ANG PROGRAMA
Sa ikaduhang hugna sa proyekto, gipahigayon ang serye sa Zumba ug Yoga sessions aron matabangan ang lawasnong kahimsog sa mga benepisyaryo.
Ang unang sesyon gipahigayon niadtong Hulyo 4, 2025, sa Barangay Ermita Gym diin gihimo sab ang Clinical Diagnosis sa tabang sa CTU-College of Nursing ug Cebu City Medical Center.
Naglakip kini sa pagrehistro sa impormasyon sa kliyente, vital signs checking, Benedict’s test, ug uban pa nga gi-supervise ni Clinical Instructor Mr. Christopher Kent Abejo, RN, uban ang 10 ka nursing students.
Niadtong Hulyo 5, nagpadayon ang ikaduhang Zumba session nga gilugwayan sab sa psychological session nga nitutok sa depresyon, stress, ug mood swings—mga kasagaran nga epekto sa menopause.
Lakip sa mga umaabot nga kalihukan mao ang Yoga sessions, mga edukasyonal nga diskusyon kabahin sa nutrisyon, relasyon panahon sa menopause, ug mental wellness.
Sa Setiyembre 26, pagahimuon ang Culminating Activity aron masuta ang epekto sa mga kalihukan sa mga benepisyaryo ug masiguro ang epektibo nga pagpadayon sa proyekto.
LUNGTAD NGA PLANO
Ang proyekto adunay sustainability plan nga gitumong sa paghatag ug mas lig-on nga suporta sa kababayen-an.
Sa katapusan nga hugna niini, tukuron ang “Kapehan sa Kababayen-an” nga usa ka community office nga mahimong kasandiganan ug dalangpanan sa kababayen-an nga gusto mangayo og tambag ug suporta kabahin sa menopause.
Human sa lima ka tuig nga implementasyon sa Barangay Ermita, gikatakda nga ibalhin ang programa sa lain nga barangay aron ipatuman sab ang susamang phased approach.
Ang tinguha niini mao ang pagpalig-on sa kapasidad sa kababayen-an sa pagdumala sa ilang menopausal transitions nga makapahimo sa mas himsog nga panimalay ug komunidad. / PR