Nagpahigayon og protest rally ang dul-an 40 ka mga miyembro sa nagkadaiyang labor groups atbang sa opisina sa Department of Labor and Employment (Dole) sa Gorordo Avenue, Dakbayan sa Sugbo, Biyernes sa buntag, Agusto 7, 2026.
Nidemanda ang mga nagprotesta nga aksiyonan dayon ang mga petisyon alang sa pagpasaka sa minimum nga suweldo sa mga trabahante.
Ang maong kalihukan gipasiugda sa CENTRO, Partido Manggagawa, Paglaum Komunidad, ug PM Kabataan nga nagsugod sa alas 9 hangtod alas 10 sa buntag.
Gipadayag sa mga raliyesta ang ilang kasagmuyo batok sa Regional Tripartite Wages and Productivity Board (RTWPB) nga matod nila napakyas sa pagtabang sa mga mamumuo.
Nanawagan sab sila sa Dole nga dili langanon ang desisyon sa suholan ug gihangyo ang mga huwes nga aksiyonan na ang mga nag-ung-ong nga kaso sa labor.
Ang mga sakop sa Abellana Police Station 2 nga gipangulohan sa ilang hepe nga si Police Captain Charlie Jay Ancheta maoy gitahasan sa pagbantay sa seguridad sa maong kalihukan.
Matod ni Captain Ancheta, hapsay ra ug walay bisan unsang kagubot nga nahitabo atol sa maong rally. / ABC