Wa na matabang ang babaye nga nagmaneho og motorsiklo human nakasugat og aksidente sa kalsada duol sa Tesda flyover sa Barangay Luz, Siyudad sa Sugbo, pasaldo alas 3 sa kaadlawon, Martes, Oktubre 29, 2024.
Nailhan ang biktima pinaagi sa nakuha nga driver’s license nga si Vannesa Fabroa Arellano, 25-anyos dalaga nga nagtrabaho nga lounge attendant sa usa ka mall ug taga Sto. Niño Village, Sityo Jasmin, Barangay Banilad, Siyudad sa Sugbo.
Ang biktima matod pa nagtadlas paingon sa norte nga bahin nga gihulagway nga kusog ang pagpadagan ug pag-abot sa maong dapit wala niini makontrolar ang iyang gimaneho nga motor ug midasmag sa poste.
Nakaangkon og kadaot sa iyang lawas ang rider resulta sa iyang pagkalagpot hinungdan sa iyang kamatayon. / DVG