Usa ka 26-anyos nga pasahero ang nasakpan sa Mactan-Cebu International Airport (MCIA) Terminal 2 nga nisulay sa pagdala og P1,149,000 nga wala ideklarar nga kuwarta niadtong Lunes, Hulyo 14, 2025.
Kini nakapapukaw sa usa ka mahinungdanong hisgutanan: ang kamahinungdanon sa pagkaalerto sa atong mga awtoridad sa airport ug ang obligasyon sa mga pasahero sa hustong pagdeklara sa ilang mga butang.
Ang maong pasahero gikan sa Basak, Cebu City nagdumili sa pagpirma sa held baggage receipt sanglit matod niya wala siya masayod sa regulasyon nga naglimite sa pagdala og kuwarta paingon sa gawas sa nasod ngadto sa P500,000.
Mahimo’ng kulang sa kahibalo ang maong pasahero mahitungod sa lagda sa airport o ba kaha iya lang kining gibalewala.
Ang dakong kantidad sa kuwarta nadiskubrehan sulod sa iyang bagahe atol sa pag-screen niini.
Tungod sa kadudahan nga hulagway nga nakita sa mga X-ray operator sa Office for Transportation Security checkpoint, dali ra kining naaksiyunan ug nakumpirma sa koordinasyon sa Bureau of Customs ug PNP Aviation Security Group (AVSEGROUP).
Sumala ni PBGen Jason L. Capoy, direktor sa AVSEGROUP, nga ang maong insidente nagpakita sa lig-on nga koordinasyon ug pagkaalerto sa security forces.
Dugang niya nga ang ilang pagkamabinantayong maoy nakapugong sa posibleng mga iregularidad.
Apan dili lang kini bahin sa kuwarta.
Nahinumdom ko sa akong kaugalingong kasinatian niadtong unang semana sa Disyembre sa miaging tuig sa Ninoy Aquino International Airport (NAIA).
Samtang naghuwat ko sa akong flight uban sa akong pamilya padulong sa Sugbo, kalit lang gitawag ang akong pangalan ug gipaadto ko sa opisina diin gi-hold ang akong bagahe.
Nakulbaan ko dihang gialirungan ko sa mga awtoridad ug gipaablihan ang akong trolley bag nga wala ko masayod unsay ilang gipasabot nga wala nako gideklara.
Sa dihang giablihan nako ang bag ug gipangkuha ang akong mga sinina ug ubang gamit, didto nila nakita ang tulo ka karton sa solar nga suga nga akong gipalit sa Raon Street sa Quiapo.
Gipahimangnuan ko nila nga sunod nako nga biyahe, kinahanglan nako ipahibalo daan sa counter nga naay sulod nga solar lamp aron dili sila magduda ug aron usab mabutangan kini og ‘fragile’ nga sticker ang bag.
Human niadto, gipa-hand-carry na lang nila nako ang solar lamps ug gi-release ko, samtang nagdali ko padulong sa boarding area kay lima na lang ka minutos molarga na ang eroplano.
Maayo na lang kay gipasaligan ko sa mga awtoridad sa NAIA nga hulaton ko ug dili ko biyaan sa eroplano, ug nakaabot gyud ko sa Sugbo kuyog ang pamilya.
Kining akong kasinatian nagtudlo kanako og usa ka bililhong leksyon: ang matag butang, bisan unsa pa kini ka gamay o daw dili importante, kinahanglan nga ipahibalo ug ideklara sa airport kon duna kini potensyal nga makahatag og pagduda.
Kini alang sa kaayohan ug seguridad sa tanan.
Ang insidente sa MCIA ug ang akong kaugalingong kasinatian nagpasiugda sa kamahinungdanon sa pagpahibalo sa publiko bahin sa mga regulasyon sa airport.
Dili lang kini usa ka obligasyon sa mga awtoridad ang pagpatuman sa balaod, apan usa sab ka responsibilidad sa matag pasahero ang pagtuman niini.