Laing Banakon o King cobra ang nasikop sa laing dapit sa habagatan sa lalawigan sa Sugbo.
Ning higayona, ang Banakon nakaplagan sa Purok Gumamela, Barangay Duangan, lungsod sa Pinamungajan niadtong Huwebes, Pebrero 15, 2024.
Si Bebie Lapis Ferrolino nga nahinabi sa Superbalita Cebu, nagkanayon nga alas 12:00 sa udto sa naasoy nga adlaw, ang iyang anak nga si Roselito nangahoy sa maong dapit ug nakuratan dihang kalit nga nituyhakaw ang ulo sa Banakon.
Nakasinggit ang iyang anak sa kakuyaw ug ang iyang duha ka ig-agaw nga sila si Edsel ug Tony daling ningtabang ug ilang gidakop ang Banakon.
Kahinumdoman, sunodsunod ang pagkasikop sa banakon sa habagatang dapit sama sa dakbayan sa Carcar, mga lungsod sa Sibonga, Argao ug Dalaguete.