Laing biktima sa Budol gang

SunStar Local News
SunStar Local News

Human sa 68 anyos nga ginang nga nabiktima og labing minos P700,000 sa Budol gang sa dakbayan sa Sugbo niadtong Biyernes sa buntag, Mayo 24, 2024, laing biktima niadtong Lunes sa buntag nidangop sa kapulisan human nadala ang P23,100 nga iya untang ideposito.

Ang uwahi nga biktima kawani sa usa ka kan-anan sa Robinsons Cyber Gate nga giigo sa duha ka mga babaye nga sakop sa gang ug nakuha ang P23,100 nga ipadeposito unta sa banko sa iyang agalon.

Si Annie (di tinuod ngan), 23, taga Brgy. Labangon, dakbayan sa Sugbo nagpatabang sa sibyaanang dyHP ug sa Abellana Police Station human siya mabiktima sa Budol-Budol sa Lunes sa alas 11:30 sa buntag, Mayo 27, 2024.

Matod sa biktima nga gikan siya sa iyang trabahoan ug gisugo nga ipa-deposit ang kwarta sa banko nga naa nahimutang sa Osmeña Boulevard, apan pag-abot niya sa Department of Health (DOH) aron molabang sa karsada, dunay edaran nga babaye nga niduol kaniya.

Ang babaye nagpatabang ug nangutana kon nakatuod ba siya sa Ramirez Trucking kay moabang siya’g sakyanan alang sa iyang negosyo nga solar panel nga i-deliver sa Dakbayan sa Lapu-Lapu.

Sa dihang nibalibad siya nga wala siya makatuod ug nagdali usab siya kay modeposit sa kwarta, niduol ang laing babaye nga gituohang kunsabo sa mangingilad ug mipahibawo nga nakatuod siya.

Giingnan siya sa kunsabo nga tabangan nila ang edaran kay luoy. Matod pa, gipakitaan siya og itom nga pouch nga puno matod pa sa kwarta nga balor og P50,000 apan gibadlong sila sa kunsabo nga dili magpakita og kwarta basin sila matulis.

Nisugot usab si Annie tu­ngod sa kaluoy ug milabang sila sa pikas bahin sa karsada ug gipabilin sa mangingilad ang pouch nga giingong dunay linibo nga kwarta.

Gipabilin lang si Annie sa usa ka pawnshop ug samtang nag-estorya, gisigihan og hikap ang iyang likod ug buhok ug giingnan nga ibilin sa edaran nga babaye ang pouch nga puno sa kwarta.

Apan nihangyo ang edaran nga aron dili idagan ang kwarta, ihatag usab niya ang P23,100 nga ipadeposit samtang gihatag usab sa laing babaye ang iyang gamay nga bag nga naa didto ang iyang identification (ID) card ug ubang mga gamit.

Nilakaw ang duha ka mga babaye ug nipasalig nga sulod sa 30 minutos mobalik sila kay kuhaon ang iyang kwarta nga gibilin.

Paglabay sa 30 minutos wala na mobalik ang duha ug dinhi na siya nagduda nga nailad siya.

Sa iyang pagsusi sa itom nga pouch nga giingong puno sa linibo nga kwarta pulos diay ginunting nga papel.

Tungod niini, nagpa blotter siya sa Abellana Police Station aron masubay ang mga CCTV camera sa dapit. / AYB

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph